蘿蔔糕拚紅豆年糕 + 唐生菜 ( 16-FEB-2026 )

今晚要食埋麻糬同豆沙煎堆喇

( 16-FEB-2026  MON )

成晚係咁發夢   臨醒之前個夢係同晴晴食壽司   我仲拎條手卷比佢食   之後鬧鐘響   但我完全唔想起身呀   哈哈 ~

今朝要食飽啲   所以出去食早餐喇 ~

諗住要個麵 "爽D"   真係好在無咋   因為啲麵已經好爽   哈哈

番到菇場掛住同家姐傾偈   完全唔記得今日係星期一要做 Report   比平時遲咗半個鐘先出呀 ~

做下自己嘢又上網睇嘢   所以好快到 1 點喇 ~

今日應該好多公司都放早   本身我搭嘅巴士係 9 分鐘先到   點知部 Lift 層層停   只剩番 5 分鐘要去到巴士站   明明好他條行去要變為跑去呀 ~

我同里奧大人 Join 埋坐同一班車   仲可以一齊坐   好記得上年架車係幾乎爆哂㗎 ~

諗住去食上海嘢   不過要等位就唔食 lu   咁去到南記都要等   所以即轉去富華   等佢執完枱就可以入去坐   但其實佢都爆哂   好感恩唔駛等就有得坐 4 人卡位   我哋見到其他人係要搭枱㗎   所以非常之感恩呀 ~

椒鹽豬扒飯 ($68) - 豬扒都幾好味道   我係要少飯   但份量仲多過里奧大人碗飯呀

泰式無骨海南雞配香茅油飯 ($71) - 呢個味道都唔錯呀

紅湯都好多菜

食完就去維園行年宵市場   我覺得今日少咗人   可能上星期六已經去哂玩   咁再請埋星期一同星期五   即係請 2 日假就可以自制 9 日假期   真係好爽㗎 ~

年宵花市入口

2026 維園年宵市場

一入到去   里奧大人就問食唔食糖蔥餅 ?!   佢真係成日會記住   仲會好留意邊檔係買糖蔥餅   總之一見有就問買唔買嚟食   所以真係覺得好窩心嘅 ~

2 月 16 日

呢個時間唔算多人

開始行喇   已經覺得好熱   哈哈

一陣先買糖蔥餅

今日真係超級超級熱   但就唔開遮啦   費事唔小心篤到人嘛   咁我遮住塊臉   里奧大人話會曬黑額頭   到我捲起衫袖又話曬黑手臂   真係好玩嘢   不過我唔會理佢講咩囉   呵呵 ~

ONE WAY 只淮向前   但次次都有人反方向行

揮春

韓國襪 ($100/9 對)   真係抵過喺韓國買   同埋里奧大人話啲質料都好呀   所以我唔客氣喇   之後職員話 $120/11 對   咁就買夠 11 對喇   其實唔係平好多   不過咁啱自己都鍾意就買啦

揀襪嘅位置係好曬   我揀完之後就流咗成身汗呀

Butterbear 係得意嘅

Load 相先知道自己影咗啲咩

臨走就要買糖蔥餅喇   呢檔好抵呀   只係 $10/件

試咗覺得好食   里奧大人再買我買多件番屋企食喇

我熱到連食物都唔想睇呀

Gimmick 嘢

走人喇

3 點鬆啲就走喇   再行真係會中暑呀   哈哈 ~

好感恩好快有巴士   因為覺得條街實在太熱喇 ~

番到屋企抖陣就去做機   今次做半個鐘都夠 ~

沖埋涼就開機洗衫   之後休息下先   里奧大人就熨衫 ~

塊皮濕哂仲諗住啲糖會腍   但估唔到居然仲脆呀

呢邊又無濕喎

買咗糖蔥餅同襪   肯定今年甜甜蜜蜜   哈哈

大家都唔係咁餓   所以 7 點 20 分先開餐 ~

蘿蔔糕 - 一打開係好多水   好在今晚開始食咋

紅豆年糕 - 又係一打開係好多水

是日晚餐 - 蘿蔔糕拚紅豆年糕 + 唐生菜

蘿蔔糕拚紅豆年糕 - 諗住煎嚟食   但里奧大人話蒸都好食   咁就好喇   今日出咗一身汗真係比較攰呢 ~

唐生菜 - 之前買㗎   呢度係 2 棵   但仲剩 2 棵   希望唔好雪壞啦 ~

洗埋碗就沖涼   今晚同里奧大人一齊睇 "青年旅舍"   睇到 11 點半先瞓覺 ~