新哥廚坊 @ 官塘 ( 6-FEB-2026 )

招牌麻辣鮑魚雞煲套餐 - 雖然我哋都食得辣   但媚媚最後話要小辣

蜆介鯪魚球 - 仍然好味道但可惜無蜆介

蒜蓉手拍青瓜 - 本身係紅油   老闆可能見我哋雞煲要小辣   所以叫我哋轉蒜蓉呀

豉椒炒花甲 ($128) - 我無食   但佢哋話一般

脆皮咕嚕肉 ($88) - 呢碟好食   因為脆皮呀

生炒糯米飯 ($108) - 呢個大家都覺得好食   同埋唔油

杏汁燉豬肺湯 - 老闆問飲唔飲 ?!   我哋話飲呀   不過唔知幾錢一盅

仲有龍眼肉同瘦肉

( 6-FEB-2026  FRI )

尋晚瞓到半夜好熱咁   但感恩都瞓得唔錯嘅 ~

今朝同里奧大人出去食早餐   我好細聲同佢講: 你坐到寒背   佢聽到話:你老婆好攰   佢奇怪點解無啦啦講好攰   之後我話個音又幾似喎 ~

食完就去里奧大人公司坐陣先番工   今日最後一日 3D   但其實對我都無咩影響   哈哈 ~

菇場唔忙   咁就好喇   今日想抖下 ~

Lunch Time 蒸好飯就去萬寧買洗頭水   買完就去惠康   幫糟糟睇下有無曲奇餅   不過無貨囉   之後佢打嚟話搵到   咁就好喇   因為我仲諗住再去另一間睇添   之後再望隻錶已經 12 點 20 分   真係要急急腳番菇場開餐喇 ~

Kracie ICHIKAMI 雙重保濕洗髮露 / 柔韌順滑洗髮露 ($89 買一送一)

唔忙又做自己嘢   今日最開心係有新銀紙   家姐都話好快呀   最搞笑佢成日話聽日開票比我得唔得 ?!   我話妳唔比都得啦   其實佢唔問   我都完全唔記得呢回事添 ~

我覺得公司真係好好㗎   會幫我哋換新銀紙

放工即走   今晚約咗菜菜仔同媚媚做節   諗住喺官塘等里奧大人   但估唔到可以同里奧大人搭一班車   因為本身 5 點 34 分實趕唔到   去到車站已經 5 點 37 分   咁啱見到里奧大人班車   即打比佢啦   佢話係呢班車就即上喇   即係佢班車其實遲咗呢 ~

我哋去 Starbucks 搵媚媚   咁之前菜菜仔幫佢買咗 4 件褸   佢要拖個細喼   所以都係去菜菜仔舖頭放低先   咁佢埋順便買嘢   食完飯就走得   我哋就食完再番嚟買嘢喇 ~

6 點半去到龍堡   全場爆滿仲要等位   所以即轉場 lu ~

食下傾下   又傾下旅行啲嘢   又傾下同事朋友屋企人啲嘢   真係傾極都有話題   真係好開心呀   之後大家又傾下將來嘅計劃   咁聽下意見都好㗎   話哂係真心朋友   真係會設身處地咁諗方法囉 ~

傾到唔知幾點   但見到多人都走喇   我哋送完媚媚去地鐵站就再去舖菜菜仔頭傾偈呢 ~

本身諗住買甜品   不過舖頭都關咗   原來已經 9 點 15 分   咁都唔去其他地方搵 lu ~

今晚大家都好放鬆咁傾下食下又飲下   感覺真係好鬼正呀 ~

菜菜仔講咗 XO 同 Whisky 嘅分別

我話要加冰   佢話咩酒就可以加冰   咩酒就唔可以加冰   其實講完都唔記得   因為我唔會買嚟飲   哈哈

年糕都煙韌呀   所以里奧大人食第一啖就話實啱我食

唔經唔覺傾到 12 點   真係無諗過咁夜   拿拿聲買埋嘢就搭的士番屋企喇   都唔理菜菜仔點搞 lu   哈哈 ~

我買咗桑椹 + 辣椒醬 + 小金仔 + 越南腰果 + 雪耳   再買多包印度大腰果比家姐

沖埋涼要灘抖一陣   因為我吹完頭唔可以即刻瞓呢   所以差唔多 1 點先瞓呀 ~