泰國菜 + 麥當勞粟米

唔駛煮飯...行步路都覺得輕鬆 d 呀

呢排公司多人感冒...所以點攰都要去街市買三個木瓜 ($11)...見到呂宋芒咁平...所以又買咗三個 ($10)...果樣雖然好似好酸咁...但都照買...因為好想食同埋想整芒果糯米磁呀

番到屋企又係煲藥...見里奧大人又未咁快番...所以順便洗埋衫...煲完藥洗完衫...里奧大人就到屋企附近喇...突然好想食泰國菜...所以去屋企附近間新開泰國菜試下...
諗住八點幾會好多人等...估唔到無人等位...唔通唔好食??
求其叫咗泰式拚盆 + 甜酸魚柳飯 + 珍多冰...唔知係咪肚餓...覺得好好食喎...同埋我直覺覺得兩個侍應似泰國人...黑黑咁...心諗咁如果待應係泰國人...廚師都應該係泰國人...唔係點溝通喎...咁即係話係正宗泰國菜啦!!最後肯定到佢地係泰國人...因為我要酸甜醬...佢同廚房 d 人係講泰文架...點解會咁肯定係泰文??因為我唔知佢地講咩嘛

又無註明係泰國菜館...只係普通餐廳形式...估唔到要加一...所以埋單 $105...
下次會再試多次...因為硬係覺得因為肚餓先覺得好食

頭先本來想叫碟菜...但又驚食唔哂...所以去麥當勞食兩盒粟米算喇...又抵呢...因為可以用 $5 買原本 $9 嘅粟米喎...係咪好抵先

番到屋企真係唔願再郁就即刻沖涼喇...電視都無咩心機睇添呀...所以尋晚十點十已經瞓喇

      

呢排早咗出門口...所以唔駛咁趕食早餐...今朝就食芝腿菠蘿包 + 熱古古力 ($15)...因為我覺得食甜嘢個人會開心 d 同精神 d...
真係心有靈犀呀...今朝行行下想買蛋糕番媽咪屋企一齊食...點知媽咪打黎話會買蛋糕...叫我唔好買...媽咪自己買喎...真係好似知我諗咩咁嘅...
之後家姐打黎又話買咗 after eight 薄荷古古力比我...真係攪嘢...因為我尋晚已經想去買...但個人好攰無去買到...點知家姐買咗比我...真係慳唔小呀

晏晝要食飽 d...因為 blog 友 see 話呢排流感犀利...要食多 d 嘢壯健身體喎...所以我食咗 4 餸車仔麵...就係辣魚旦 + 豬腸 + 豬紅 + 菜肉雲吞米線呀...$21 好似好多選擇咁...幾好呢...但點解好似唔多飽咁嘅