稻香 @ 九龍灣 ( 16-APR-2015 )

雲箂鮮菌粗齋 - Menu 影出來乾爭爭咁   所以媽咪成日話食   我都話唔想食   不過媽咪講咗咁多次   咁比佢食啦   估唔到又好味喎  用蒜蓉炒好香呀   不過最好食係啲琥珀合桃呀   哈哈

七味豆腐 - 好味呀   所以叫比家姐食   

一蚊雞 - 我哋食咗 2 隻   不過次次都係食完一隻先再叫另一隻   因為可能到時食完一隻會唔想叫家嘛   所以我唔明點解啲人次次都叫 2 隻先   凍咗都唔好食啦

( 16-APR-2015  THU )

今朝熱番啲咁喇   不過熱埋聽日   星期六又潮濕又雨喇   唉 ~

早餐食奶醬多   嘆陣報紙又番工 lu ~

菇場唔忙   但其實有自己嘢要整   不過難得大粒唔喺度   想 Hea 下   哈哈 ~

今日有 Lunch Box   咁 8 卦想試下我整嘅豬軟骨   所以比 2 嚿大嘅佢試啦   因為我拎埋聽日份 Lunch Box   咁佢幫手食 2 嚿都好   實在太多嘛   估唔到佢話堅正    唔韌唔濃味好味道呀   算佢啦   咁比臉   哈哈 ~       

阿齋又鍾意煮濃味嘢   之後傾下韓式醃肉醬   死 8 卦聽到咁正又想買   所以跟我去 759 買嘢呀   佢真係師奶過師奶   哈哈 ~    

呢幾日都得閒   今日終於要還啦   4 點先嚟忙   仲要係有排搞嗰隻 ~

放工都仲未做哂   做哂應該要 8 點先放工   咁無可能發生喺我身上啦   哈哈 ~ 

今晚同媽咪去稻香   我 5 點 45 分到咗啦   已經見到媽咪排緊隊   仲要係十幾個人喺前面排緊   但要  6 點先可以入座   之前都唔駛嘅   因為無咩人會咁早到啦   應該係一蚊雞太多人食   個個 5 點去到攞位就唔係咁好囉 ~

依家去稻香   真係每枱一定有雞   仲要係一叫就叫 2 隻   一係就 3 個人叫 3 隻   10 個人就叫 4 隻   好誇張   咁我見佢哋都有叫其他餸嘅   但隔離枱 2 女 1 男先勁   6 點半已經食哂 2 隻雞   之後又叫多 2 隻   佢哋似 60 歲左右   基本上呢個年紀唔會食到咁多肉家嘛 ~     

家姐 7 點到喇   食下傾下   隔離枱再叫多 1 隻雞   好嚇人啦   3 個人食 5 隻雞   得個男人叫碗白飯   女人就咁食雞   真係好勁 ~

之後媽咪等杏仁茶   家姐就叫我陪佢去 759 買咖啡   我諗住拎張會員卡   點知拎咗公司卡出嚟   咁家姐問做咩拎張公司卡出嚟 ?!   我先知拎錯   哈哈 ~   

8 點埋單走人   家姐話隔見到佢哋只係拎咗 2 張廿蚊紙咋   咁我計過   佢哋埋單只係 $38.5   個男人仲話唔駛找添   真係難以想像   一個人去大家樂食嘢都要成 $40 啦   依家 3 個人食先係 $40 咋 ~

咁我哋埋單都平啦   只係 $160 咋   家姐以為計錯數   因為佢以為個豆腐要 $6x   其實只係 $28 之嘛   所以我話晏晝飲茶都唔止 $160 啦   真係好鬼抵 ~

家姐見到有巴士就走喇   佢拎咗起碼 20 磅嘢   因為媽咪買咗好多嘢比佢   又煲埋湯比佢   唔重先奇   咁我送埋媽咪搭車就番屋企喇 ~

媽咪分別買咗一梳比我同家姐   我呢梳係已經比咗 8 條媽咪㗎喇   唔係仲大梳

(左) 桃哈多薯圈 (濃厚洋蔥清湯味) 原價 $11.8/包   7 折之後 HK$8.3/包
(中) 呢包折咗好似 $5.6/包咋   所以買多包比家姐食 
(右) 厚切脆條 (沙律味)   原價 $9.9/包   7 折之後 HK$6.9/包   家姐話今日已經想買呢包比我食   因為佢記得我鍾意食   我話好在佢無買咋   唔係又要食 2 包好辛苦啦   哈哈  

買番啲健康零食先   左邊包 Nuts 折咗好似 $10 左右   右邊包 Melon 蒟蒻折咗好似差唔多 $6   無咗張單   唔記得價錢添

原價 $19.2/ 樽   折咗之後 $13.44 咋

里奧大人今晚同客食飯   都應該好夜番㗎喇   咁我都唔徑步   想靈修   所以即沖涼   之後睇哂一章聖經   睇完又睇下雜誌   之後里奧大人就番屋企 lu   原來已經差唔多 10 點 45 分喇 ~

佢話個鬼佬唔知做乜鬼咁好傾   已經 7 點半開始食啦   諗住 9 點會食完   點知食到 10 點   仲話個鬼佬勁現實   請佢去啲貴嘅地方食嘢   又開咗 2 支白酒比佢哋飲   開心到連私人 Whatsapp 都比埋佢呀 ~

等埋里奧大人沖涼   傾多陣   11 點半瞓喇 ~