燻蹄 & 滷水鴨腎 (外賣) + 海皇醬炒脆肉瓜 ( 29-APR-2015 )

( 29-APR-2015  WED )

尋晚瞓覺嘅時候   個胃都係頂住頂住   下次真係唔敢又酥皮又 Pizza 喇 ~

有時瞓覺之前都會同里奧大人傾下偈   一講親啲咩   佢就問我點解點解   我話鬼知咩   佢就會高八度嘅聲   叫我上網查啦   尋晚佢問我點解叫二五仔 ?!   其實我都好想知   咁睇完網上解釋   咁依家係現代嘛   即係其實叫 7 仔都得啦   哈哈 ~  
          
解釋：原是中國清代秘密會社的切口，意指告密者、叛徒、出賣組織的內奸和專門在人後說是非的人。

故事須從火燒少林寺說起：話說清朝康、雍年間，朝廷要徹底消滅反清復明的秘密會社，查得少林寺與天地會有千絲萬縷關係，派兵前往剿滅。但需要有少林寺內奸裡應，卒之收買了武功排名第七的少林俗家弟子馬寧兒。姓馬的窮凶極惡，犯下大罪，被逐出山門，含恨引清兵入山，火燒少林寺。秘密會社中人不恥其所為，日後便稱那些告密者、叛徒為二五仔，即排第七的馬寧兒了。

今朝食早餐就搞笑啦   咁睇新聞講話有人被勒索 2,800 萬   之後個女人好驚訝咁同個老公講話   "有錢婆喎"   我差啲笑出嚟   唔有錢鬼得閒勒索妳咩 ?!

菇場忙喇   因為要 Pack File 入櫃   最衰西瓜啦   無啦啦見同事搵 File   就問我係咪無紙箱 ?!   我其實想 7 月先一次過 Pack   點知都係唔懶得   哈哈 ~

阿花同阿爽好好人   話幫我一齊 Pack   不過我話唔駛啦   我一個都 OK 嘅   同埋我本身都諗住今朝 Pack File 入櫃   咁啱 8 卦同我講   一陣西瓜同佢哋喺我隔離房開會   咁一定唔會上到網啦   時間真係啱啱好   哈哈 ~

太好喇   差唔多 11 點就 Pack 完   終於了咗心事   但 Pack 到成身汗呀   好在菇場冷氣夠凍   坐一陣就即刻爽哂 ~

終於收到電話費 SMS   好在都係 $90   因為我之前喺澳門   開咗流動數據先開 Wifi   勁豬兜呀   明明已經叫里奧大人幫我關咗流動數據嘛   咁我夜晚又打機   又 Download 咗個澳門 Map 嘅 Apps   咁會用好多數據家嘛   一定一定比里奧大人鬧死我都似   第時去旅行都唔打機喇   唔係一陣唔小心開咗流動數據嘅 Icon 就死得 ~

勞動完就開始餓喇   所以今日出去食韭菜餃上海麵   其實我最主要係想飲醋消消滯   哈哈 ~

行一陣   買埋脆肉瓜都 1 點 20 分喇   要番菇場喇 ~

又忙下停下   所以好快放工   今晚買外賣算喇  好鬼攰 ~

7 點食瓜同埋食沙律   等埋里奧大人先再食燻蹄   之後執下櫃   完全唔記得家姐喺韓國買咗 Laneige 比我   真係好在執下咋   唔係又走咗去買 Cream 㗎喇 ~    



食完抖陣   8 點去徑步   今晚好焗熱   徑咗半個鐘就要番屋企喇 ~

是日懶餐 - 燻蹄 & 滷水鴨腎 ( 外賣 ) + 海皇醬炒脆肉瓜  

燻蹄 & 滷水鴨腎 ( 外賣 ) - 勁想食好耐喇   所以點都要買   鴨腎 2 隻要 $20   好貴呀   我好耐之前試過炒鴨腎   但炒完之後唔想食   如果唔係我會自己滷鴨腎   因為應該會平好多   哈哈 ~

海皇醬炒脆肉瓜 - 想惹味啲呀   所以開鑊炒啦   如果蒸就最正   因為唔駛洗鑊   呵呵 ~     

里奧大人 8 點半放工   咁我沖埋涼先   之後再陪佢食飯   唉   因為煮多咗飯   佢又食得少   成日話食好少嘢   但一個出前一丁夠飽啦   又唔見咁講   麻鬼煩 ~   

食完飯已經夠飽   仲要食埋之前嘅榴槤   因為已經擺咗喺雪櫃 4 日   唔食驚壞囉   食完呀   我真係好想去徑多次步呀   哈哈 ~

好攰呀   真係 11 點要瞓   年紀大喇   郁幾郁就攰到死 ~