茄汁煎蝦碌 + 酸梅麵豉蒸排骨 + 蒜蓉炒莧菜 ( 7-APR-2015 )

( 7-APR-2015  MON )

今日係最後一日假期喇   時間過得真係快 ~

約咗媽咪同家姐去美心皇宮飲茶   所以 10 點半起身   沖埋涼就去攞位喇 ~

11 點去到酒樓都好多人囉   要等 90 張枱   不過媽咪想飲茶   我點都會等呢 ~

媽咪差唔多 11 點半嚟到   叫咗一半 Number 咋   所以我叫佢同工人周圍行下先   不過其實好多 Number 都無人嚟   咁又係嘅   德福好多酒樓   聽到有個婆婆話唔知邊間實有位添呀 ~

好感恩 12 點終於有位   即打比里奧大人   之後家姐無耐都到 lu ~

有點心車   仍會有人捧點心出來   

寫埋大中小點   其實佢哋大點最多囉   

蝦餃 - 暖嘅   因為係人手捧出來嘅點心喇   媽咪又心急叫   我都話睇定啲先叫   之後有個阿姐捧住 4 籠有煙出㗎   唉

梅子蒸排骨 - 雖然係點心車叫   不過都係暖   上次同阿 mi 嚟過飲茶   點心都係唔熱

百花紫菜卷 - 媽咪叫㗎   我其實麻麻哋 

百花釀青椒 - 個青椒係爽嘅   好似無煎過咁   頭果幾轉啲點心真係唔太掂噃

錦滷雲吞 - 好脆呀   起碼感覺新鮮熱辣   哈哈  

個汁無咩味   

龍蝦湯鮮竹卷 - 終於食到熱嘅點心喇   勁正

干蒸牛肉賣 - 都係熱   所以勁正

瑤柱扒柚皮 - 媽咪同工人食   我對柚皮無咩興趣

四寶滑雞扎 - 我無食呀   里奧大人叫㗎   雞就比工人食   魚肚比媽咪食   其他佢食    

欖仁馬拉糕 - 之前嗰轉想叫㗎   不過佢仲未推到嚟   但推到嚟嘅時候就無哂   所以等佢囉   由頭等到尾   一見到有馬拉糕就即去拎喇   因為我覺得好好味 

味菜牛柳絲炒麵 - 驚工人唔夠飽   所以叫呢個麵囉   佢唔食豬肉同海鮮嘛   平時問佢飽唔飽   佢會話好飽   今次里奧大人問佢飽唔飽   佢居然無話飽   家姐話佢好少會咁   即係真係未飽   咁又係呀   無咩點心啱佢  

仙翁米杏仁茶 - 媽咪自己食   佢話客家好棧好味啲喎

飲到 2 點   家姐要帶 B 頭睇醫生   所以佢自己走先   我同里奧大人就送埋媽咪去搭的士   之後我自己去街市買餸   里奧大人就番屋企趕住做公司嘢 ~

番到屋企都 3 點   里奧大人話瞓陣晏覺   我攰不過唔想瞓   咁就浸埋菜同預備晚餐   開埋機洗衫就抖喇 ~

B 頭要入院吊鹽水   話個腎啲唔知乜乜止數高咗   但唔算嚴重   因為好在佢早睇醫生   唔係就煩喎 ~   

4 點幾再焗番熱啲特韌曲奇做 Tea   再食塊豬油糕   媽咪話好甜   唔食喎   又要我特登買比佢食   不過我又覺唔係好甜噃   同埋煙煙韌韌幾好味   叫佢比番我食 ~

我要咗每樣 2 粒   其他就比哂媽咪同家姐 

  
今晚早啲食   想早啲徑步   所以 5 點 45 分煮飯喇   6 點半有得食 ~

是日晚餐 - 茄汁煎蝦碌 + 酸梅麵豉蒸排骨 + 蒜蓉炒莧菜  

茄汁煎蝦碌 - 想煮好耐   但我覺得即食先好味嘛   所以特登買 1 份蝦嚟煮比里奧大人食呢 ~

酸梅麵豉蒸排骨 - 今次醃到啲排骨好鹹   好在有煮飯   用嚟送飯好呀   哈哈 ~ 

蒜蓉炒莧菜 - 尋晚淥菜   咁今晚炒菜啦   感覺上好似唔同嘢咁嘛 ~

搞掂哂就抖陣   8 點半出門口   點知落毛毛雨   咁去商場行一個圈   之後番屋企做保健操算喇 ~

真係超勁攰   原來每月一到   所以即沖涼休息喇  ~

睇多陣電視   10 點 45 分自己瞓先喇 ~