丸龜製麵讚岐烏冬專門店 @ 九龍灣 ( 8-AUG-2015 )

熱醬油烏冬 (中) ($29)
炸雞塊天婦羅 ($13) / 野菜魷魚 ($13) / 胡麻雞柳天婦羅 ($14)
我係團購 $32.5 換 $50   所以比 $19 就搞掂    

眼闊肚窄   所以呢塊野菜魷魚要拎走   番到屋企再食   好難食呀   哈哈     

溫泉蛋烏冬 (大) ($44) 
海老天婦羅 ($13) / 蕃薯天婦羅 ($7) / 魷魚鬚 ($10) / 忌廉 ($8)
呢個比 $32.5 就搞掂

( 8-AUG-2015  SAT )

今朝行遠啲食早餐   食完米粉其實都唔熱   但行到番菇場就成身汗   勁想番屋企沖涼呀 ~

菇場忙下停下   係咪邪呀   星期六都唔可以比我抖下   哈哈 ~

放工即走   約咗里奧大人喺 Megabox 等   今日搭 107 巴士   好在之前同事教我   我又同家姐講咋   因為家姐話過海巴係平啲   呢架 $5.7 咋   如果搭 297 要 $9.9 囉   但 107 要兜入麗晶   同埋車程係接近 20 分鐘   如果 297 只係 10 分鐘   不過我唔趕時間咁當然搭 107 啦 ~      

架巴士無冷氣咁   個個開住風扇仔   仲以為得我覺得熱添   唉   又熱到成身汗   好在商場冷氣夠   唔係真係無心機行呢 ~

今次去十豚勝丼試下先   因為我想食牛肉飯定食呀 ~
  
牛肉炒雜菜定食 ($45/Set)   仲有飲品   好抵喎  

里奧大人嘅烤薄腩片麵豉湯拉麵  ($40)

 之後去大眾買嘢   全場正價 8 折    實在太好喇   買咗 $540   咁我可以做埋會員   正呀 ~

咁我買咗 2 支原子筆   因為頭一頁比人畫花哂   咁用新一頁試下啦   點知一揭就揭到呢頁   超勁邪呀   邊個咁搞鬼呀   哈哈           

中間個女仔應該係小朋友畫啩   咁我唔想佢咁孤單   所以我畫咗個男仔   再畫多個小朋友   咁就變咗一個 Happy Family 啦   勁無聊   同埋我啲畫功真係衰過小朋友啦   哈哈     

原價 $327   8折之後就 $261.6   勁想買佢啲食譜好耐啦   今日終於擁有   勁開心呀   其實想買英文版   不過真係唔想下下搵生字   咁搞法真係見到本書都驚   哈哈   里奧大人仲衰   佢話點解買咗咁多食譜   煮啲嘢都無乜變化   我話本書話   跟呢本食譜煮嘅人   首要係唔駛番工   咁先可以煮到呢   佢當然唔信啦   哈哈      

克麗木顏色筆  ($70)   折咗之後就 $56   
鉛筆刨 $6.5   折咗之後就 $4.9   家姐仲搞笑   話比我眉刨我當筆刨   我話唔要呀   里奧大人仲衰   叫我唔好刨咁尖   哈哈  

我好鍾意去 Home 21 睇嘢㗎   今日仲全場 88 折   又係好吸引   最正係里奧大人比我買個玻璃水樽   但其實我只用嚟做裝飾呢   哈哈 ~   

原價唔記得係 $129 定 $149   依家特價 $99

好似粒大鑽石咁   哈哈

里奧大人話呢個都幾靚   所以佢話買㗎   呢個又係特價 $99   

鵝卵石擺設 (原價 $49)   折咗就 $43.1   因為鍾意佢殘殘舊舊  

鵝卵石擺設 (原價 $24)   折咗就 $21.1   又係想買好耐啦   依家有折就買喇   里奧大人問我之前本身係幾錢   會唔會平過 $21   咁我又唔記得喎

之後再去十蚊店買藥盒比媽咪   不過就唔係之前啲款囉   不過照買   反正行開嚟呢度   今日買十送一   所以買夠 11 件   呵呵 ~

$12 嘅香薰座     

$12 一隻都抵   因為我鍾意呢啲款呢   

買夠就走人   其實對腳開始有啲攰   哈哈   本來諗住坐 Shuttle Bus 番九龍灣   不過又係好多人等   所以都係行路番屋企 lu ~

番到屋企 5 點半喇   抖多半個鐘就落去食嘢   之後行咗陣 Taste 就走喇 ~

咁打比家姐問媽咪情況啦   之後家姐話媽咪唔係幾好   話姑娘話媽咪心臟有啲發大   同埋可能要洗腎   但就要等腎科醫生評估咗先囉 ~

聽完當堂無哂心機啦   想喊又唔可以喊   之後里奧大人同我急切祈禱   等我平靜啲 ~

今晚喺影藝睇 7 點 20 分嘅 Mission Impossible   都 OK 好睇啦   不過無上集咁緊張   同埋可能我又心不在焉   有啲都無咁認真睇呢 ~

睇到都 9 點半   里奧大人去徑步   我就番屋企先喇 ~

再打比家姐   問番媽咪頭先點樣   佢話媽咪驚囉   係咁喊   又無咩食嘢   之後又問阿妹呢 ?!   家姐話阿妹好攰唔嚟   唉   嗰下我覺得自己超勁衰格   正一死女包   無去探媽咪   之後我要拿拿聲收線   因為里奧大人未番嚟   我要襯呢個時候   一路沖涼一路爆喊   喊咗 15 分鐘真係舒服好多   不過唔可以再問媽咪點樣   如果唔係我又會喊 ~ 

開機洗埋衫就休息下   睇陣電視   12 點都瞓喇 ~