麥當勞 @ 九龍灣 ( 28-AUG-2015 )

( 28-AUG-2015  FRI )

尋晚瞓得唔係咁好   所以無咩精神 ~

早餐食奶醬多   其實真係無胃口   食到一半已經唔想食   不過無理由咁嘥   慢慢慢慢食咁囉 ~

菇場忙呀   咁都好   時候過得快啲 ~

Lunch Time 出去行下   之後忍唔住喊住打比里奧大人   唔明媽咪做乜鬼   明明出去食   但就同我講話喺屋企食蒸魚   都唔知佢想點   其實我覺得好煩   出去食就出去食   做乜要講大話   好在依家可以同工人 Whatsapp   都知道佢其實食咗咩 ~

喊完好啲   所以買嘢食番菇場   其實又係食兩啖已經想唔食   雖然係我至愛嘅炒米粉   但覺得今次好難食呢 ~

2 點幾收到工人 Whatsapp 話媽咪唔食嘢   之後家姐打嚟話工人喊哂   好驚媽咪唔食嘢   咁即打比阿姨   之後再打比姑娘   佢話媽咪血壓心臟正常   喺佢哋角度其實無咩問題   但在於屋企人角度就可能有問題   所以如果再唔食嘢   就去醫院囉 ~

又令到我無哂心機   真係驚到對手都冰哂   好在今晚唔駛煮飯   所以都諗住去探媽咪   等我自己個心定啲 ~

放工即去媽咪屋企   問佢食咗嘢未   佢反而問我去唔去食嘢   咁好啦   陪佢一齊坐下都好   難得佢肯坐 ~

紅燒野菌豆腐算最清㗎喇   最緊要佢肯食飯   咁先有氣力   我依家真係好矛盾呀

工人同我講話媽咪唔食嘢   佢喊住同媽咪講   再唔食嘢佢走㗎喇   之後媽咪叫工人切半個梨   飲咗啲奶   咁都好   依家真係要靠工人㗎喇   我實在好感恩有呢位工人   緊張媽咪程度比我同家姐更為甚呢 ~

里奧大人 7 點 15 分放工   不過我話未走住   坐到 7 點半左右   條腰骨無啦啦超勁痛呀   所以都要走喇 ~

陪埋媽咪番屋企   祈完禱就坐車走人喇 ~

約里奧大人喺屋企附近等啦   但我真係無咩胃口食嘢   所以去麥當勞算喇   想快啲食完快啲番屋企 ~

沖埋涼就睇電視   11 點瞓喇 ~