炒粒粒 ( 25-AUG-2015 ) + ( 26-AUG-2015 )

( 25-AUG-2015  TUE )

今朝有啲焗熱   所以喺街度見到啲人着西裝   都覺得佢哋辛苦   可能佢哋都應該習慣咗   唔係點頂呀   咁鬼熱 ~

早餐食奄列   正想食嘅時候   8 卦又嚟到   食下傾下   好快又要番工 lu ~     

菇場勁忙呀   做到 Lunch Time 都未做完   留番一陣再做 ~

食完 Lunch Box 就落去行下   行咗 15 分鐘就即番菇場喇   條街好焗熱呢 ~

做埋啲手尾   3 點幾就可以 Hea 過喇 ~

放工去街市買餸   番到屋企抖陣   抖到 7 點   見里奧大人都未打嚟   咁我都預備定先   因為我用較剪剪粒粒   所以要多啲時間   剪到咁上下   里奧大人話已經喺九龍塘   咁遲先打嚟   我又要快快手煮嘢啦 ~       

是日晚餐 - 炒粒粒

炒粒粒 - 今餐用魚蛋代替豬肉   咁又唔錯喎   因為我唔想食咁多紅肉呢 ~

搞掂哂就開機冷衫   咁里奧大人去徑步   我就熨 3 機衫當做運動   佢番到嚟   我先熨完   抖陣就沖涼 lu ~

終於每月一到   唔怪得咁鬼攰   咁睇多陣電視   11 點幾都瞓 lu ~     

( 26-AUG-2015  WED )

今朝個肚少少痛   不過就成晚瞓得唔好   所以都係請病假 ~

都唔知做乜鬼   肚就唔係咁痛   但成鬼日嘔   呢下先辛苦 ~

瞓到 10 點半打去診所掛號   不過要 11 點 45 分先有得睇   咁好啦   再瞓過 ~

11 點 45 分去到   等到 12 點 05 分先有得睇   醫生見到我   話做乜事臉青青    青得好緊要   我話瞓得唔好   佢問我做乜瞓得唔好   我話擔心媽咪   佢問擔心啲咩呀   我話佢腎唔好囉   又唔戒口又懶   佢安慰我話媽咪認為咁開心咪有佢做囉   人生在世   如果妳要佢做乜做乜   佢又唔開心   而妳叫佢做   佢又唔做   變咗令到妳自己唔開心   咁不如妳放開啲   唔好諗咁多   其實都係嘅   我諗咁多都無用囉 ~

我其實最驚出診所   因為次次都係暈陀陀   唔知係咪出面太曬   所以我都急急腳行番屋企   一到大堂就望下塊鏡   原來塊臉真係超級白   咀唇又無血色   都幾恐怖下 ~

番到屋企點都要沖熱水涼啦   好在無暈   哈哈 ~

好喇   又瞓下醒下   瞓到 5 點就出廳喇   諗住睇下電視   點知都係瞓着咗   瞓到 7 點半   勁呀 ~

里奧大人今日上大陸   好感恩佢都 7 點到上水   叫佢食埋嘢先番屋企   佢番到嚟都 9 點 lu   咁我都沖涼洗頭喇   因為今日全日無食嘢   洗頭就真係驚會暈㗎 ~

食埋藥   10 點即瞓   因為好難得今日全日瞓   而 10 點都有睡意呢 ~