榨菜肉未配叉子燒餅 + 菜心 ( 30-AUG-2015 )

( 30-AUG-2015  SUN )

今朝 9 點半起身   因為家姐 10 點會到媽咪屋企   所以我話買早餐去媽咪屋企一齊食 lu ~

食完又傾下偈   家姐居然對 Secret Garden 有興趣   所以比 2 頁佢畫啦   里奧大人就做公司嘢   我就打機   話咁快又 1 點   所以同媽咪去飲茶喇 ~

飲到 2 點幾   媽咪要番屋企食藥   我哋正想開門   聽到後面有人喺度笑   原來係工人番咗嚟   咁就好喇   可以跟番媽咪啲藥   因為我哋實在太論盡喇 ~

最搞笑係工人依家好緊張媽咪食唔食嘢   仲細細聲問我   媽咪有無食嘢   我覺得佢似媽咪個女多過我似   因為我無佢咁細心呢 ~

3 點同家姐一齊走喇   我又拎咗啲牛肉同魚   之後買埋菜就番屋企   里奧大人就瞓覺   我就睇下雜誌咁囉   其實個人好攰   但瞓唔到 ~

呢排個人攰到無咩記性   完全唔記得打番去問牧師探訪情況   所以記得就即打   牧師話媽咪表面唔抗拒   但仲未係願意真正接受主   咁我都知嘅   但最緊要唔好抗拒就得   牧師同佢祈禱   佢都好開心   之後仲話請牧師飲茶   呢下搞笑   佢哋傾咗半個鐘左右就走喇   但之後會再 Keep 住探媽咪   咁都好   等佢更加認識神   做一個好好嘅見証呢 ~   

6 點開始煮嘢   6 點 45 分有得食   因為其實今晚係超級簡單   哈哈 ~

是日懶餐 - 榨菜肉未配叉子燒餅 + 菜心 

榨菜肉未配叉子燒餅 - 尋晚食唔哂呀   所以我拎番屋企食   但其實我已經比咗半盒人哋㗎喇   如果唔係又要食多幾餐都似   因為今晚都食唔哂   要留番聽日做 Lunch Box 囉 ~     

菜心 - 我無咩胃口   所以煮咗半斤菜心算喇   估唔到啲菜心好甜喎   定係我太耐無食菜呢 ~

搞掂哂就同里奧大人一齊去 Taste 買果汁同合桃比媽咪   因為我哋想買啲無 Sodium 嘅嘢   咁比媽咪食下零食   無咁悶嘛 ~

番到屋企沖埋涼   睇下電視   11 點幾瞓 lu ~