嘉華大酒樓 @ 官塘 ( 24-AUG-2015 )

清蒸茄子   呢個餸反而超級鹹   仲諗住清清哋添 

豉汁蒸黃立鯧 

白切雞 (半隻)

( 24-AUG-2015  MON )

今日請假陪媽咪覆診   不過 9 點都醒咗   咁沖埋涼就去食早餐   之後就去媽咪屋企 lu ~

坐到 12 點就出去飲茶   飲到 2 點就搭的士去覆診喇 ~

媽咪話食紅燒豆腐   咁是但啦   豆腐都 OK 嘅

絲瓜雲耳炒鮮魷   呢個又係媽咪叫㗎   真係唔慣晏晝食呢啲   哈哈   所以我都無咩點食

覆診時間係 2 點 15 分   但等到 4 點 20 分先睇呀   勁攰   我同工人又唔敢瞓喎   一陣聽唔到個名就大鑊嘛   哈哈 ~

今次嘅醫生超級好人呀   見咗起碼有 15 分鐘呀   佢又會問媽咪點樣   咁我好多嘢問嘛   佢都講解得好清楚   真係好在陪媽咪    咁佢就無得講大話啦   醫生叫佢唔好出街食   因為腎衰竭要食好清   雖然腎功能唔好   但就唔係好差到要洗腎喎 ~

所以我成日同媽咪講   自己唔郁真係無人幫到妳   工人已經扶住佢行 10 分鐘   但一日行 10 分鐘邊夠呀   唔郁真係乜嘢機能都差啦   講妳唔聽   其實真係好煩   但我依家唔會鬧啦   係妳自己放棄自己   我唔想成日講   我都講到煩   妳要做就做  唔做就算   勸唔聽鬧又唔聽   妳鍾意點就點   最緊要唔好後悔自己所做嘅行為就得㗎喇 ~          

拎埋藥   番到屋企都差唔多 5 點幾   超級勁攰   所以抖到 7 點先出去食嘢 ~

今晚里奧大人都嚟食飯   佢話想睇下媽咪   佢 7 點半到酒樓   真係好感恩   因為算快嘛   初初佢預計要 8 點㗎   無諗過放工可以即走呢   但佢話頭先熄電腦嘅時候   有同事問佢嘢   佢勁驚又問好耐   好在問咗 1 分鐘咋   唔係就無咁快嚟到呢 ~

家姐衰啦   尋晚無啦啦話媽咪塊臉黃得好犀利   搞到我尋晚勁擔心   驚到喊   所以好似無瞓過咁   咁頭先同里奧大人都經過間餐廳   係餐廳啲燈光好黃呀   所以媽咪塊臉咪好黃囉   真係呢 ~

食到 8 點幾就番媽咪屋企   坐咗一陣又到 9 點   所以祈完禱就番屋企休息呢 ~ 

番到屋企即沖涼呀   抖陣又睇下電視   之後收到大食 Whatsapp 話婆婆因為食飯時暈一暈   所以入咗醫院   希望婆婆無事啦 ~

今日真係好攰   11 點自己都瞓先喇 ~