Pizza Hut 套餐 (外賣) + 帶子刺身 ( 7-AUG-2015 )

2-3人普通批餐 ($168) 外賣自取有 8 折   只係 $134.4  好抵囉   因為就咁食呢個錦繡至尊批都要 $132 呀   我哋要薄批   因為厚批太飽肚喇 

肉醬意粉 - 得 2/3 盒咋 

田園沙律

整咗 15 隻   好似仲剩 8 隻   下次再食埋去就清哂喇

( 7-AUG-2015  FRI )

起身好頭暈   要坐一陣先可以去沖涼   唔知係咪尋晚瞓得唔好呢 ~

今朝超級熱呀   台灣打風   仲要係經過果隻都影響到香港咁焗熱   今日話最高氣溫係 35 度   真係熱過越南 ~

食食下早餐   聽到餐廳啲人同個客對話好好笑   佢哋講開中年發福   個男人話未結婚之前   好似道友咁瘦   咁生完仔之後就好似打針咁   谷肥哂   我真係忍唔住笑咗出嚟   講到佢自己生仔咁   之後佢話佢老婆坐月   佢又變咗坐月   佢老婆飲湯   佢就日日食湯渣唔想嘥嘢 ~

菇場唔太忙   但個人暈暈哋   所以都係抖下好啲 ~

食完 Lunch Box 就出去行下   買咗青提子   一包要 $43   好貴囉   仲諗住 $30 添   之後去買 Secret Garden 嘅畫薄同顏色筆   Total $66   應該抵啩 ~   

呢排飽飽滯滯   所以頂唔順買呢隻酸糖食呢

放工即走 lu   去影藝買完戲飛   又要幫家姐去藥房買香必飄 Re-fill   不過無貨   咁順便去埋價真棧買乳酪啦   再去埋 Pizza Hut 問外賣自取駛唔駛特登拎電話落嚟儲分   佢哋話要   即係一陣又要我行多轉啦 ~

里奧大人 7 點半番到屋企   咁坐多 15 分鐘就陪我落去 Pizza Hut   依家啲食店好煩   下下要 Download 佢哋嘅 Apps 先做到會員   大佬   唔係個個人手機都可以上網家嘛   同埋 Pizza Hut 個 Apps 超級麻煩   我上次整咗成個鐘呀   又 Download 又剷都搞唔掂   按登入都按唔鬼到   所以放棄   咁今晚去到先再入去佢哋 Apps   無啦啦又話唔得   又要出出入入   個 Staff 之後都係按幾次先入得登入   佢都覺得唔好意思呀 ~    

外賣自取都快喎   20 分鐘搞掂   我地 8 點 20 分番到屋企   家姐無耐就到喇 ~

問媽咪情況點啦 ?!   佢話依家聞 1 度氣   咁好喎   減咗 1 度   又話媽咪今晚自己食嘢   最搞嘢係等埋家姐先食盒干炒牛河   工人 5 點半已經買咗   家姐 7 點先到   凍哂唔好食嘛   媽咪又叫家姐唔好走住   話佢係合埋眼唔係瞓   今晚媽咪好聽話喎   我最開心呢   之後問家姐   媽咪有無問我嚟唔嚟   家姐話有呀   問阿妹呢 ?!   不過家姐話阿妹攰   叫佢唔好嚟   哈哈   佢無話比媽咪知   我因為激氣唔嚟呀 ~

食完抖陣   再同家姐食薯片   差唔多 10 點就走喇   我送佢搭車   里奧大人就去徑步   我今晚唔徑喇   今日持續都有啲頭暈   我唔想死住   哈哈 ~      

同家姐等等下車   佢同我講話個女仔係咪 CC   我一望原來真係 CC 呀   不過我叫完 CC 之後   佢哋要上車啦   講多句都唔得 lu ~

最搞笑係家姐講番比我知   CC 去德福食飯諗住搭 13D   咁啱其實家姐又想搭 13D   不過我叫佢去德福站搭其他巴士啦   我陪佢嘛   咁 CC 就係見到德福站多人等巴士   所以就等啦   佢好彩啦   等咗 5 分鐘   我同家姐去到巴士站係一個人都無㗎   不過我哋掛住傾   都唔知等咗幾耐   不過一定有 10 分鐘呢 ~

其實見到 Blog 友買咗   所以我又買嚟畫下   不過佢話畫咗幾條毛已經放棄   哈哈   但我會畫哂成本為止   里奧大人同家姐話我一定唔會畫哂全本喎   太睇少我吧   我就畫哂比妳哋睇   比啲時間我就得㗎喇   呵呵

里奧大人仲衰   話我一嘢求其畫花成頁   就當畫完   駛唔駛咁講嘢呀

我真係 N 年無用呢啲木顏色筆   但我覺得一畫就 "啜" 住 "啜" 住咁   又唔太上色   總之畫起上嚟好唔順手啦   所以同里奧大人講聽日去大眾買番 Pack 似樣嘅木顏色筆   仲要買番個鉛筆刨添喎   佢話依家一闊三大   唔畫哂就知死   哈哈哈哈

番到屋企即沖涼喇   再睇多陣電視   11 點半瞓 lu ~