西蘭花炒帆立貝 + 煎鯧魚 + 牛大力土伏苓豬骨湯 ( 20-AUG-2015 )

( 20-AUG-2015  THU )

又星期四喇   我覺得一過咗星期一   之後啲時間就會過得好快呢 ~

今朝食蛋牛治   以前鹹牛肉真係鹹鹹香香   依家真係無咩味 ~   

其實我發覺依家食咩都無以前咁好味   就算用開嘅家庭用品都一樣   唔好講幾十年前   就講呢幾年   我不嬲用開 Johnson Baby 沐浴露嘅甜睡沐浴露同埋藍色樽嗰隻   因為貪佢香噴噴   之後就轉下 Dettol 牌字   咁今次屋企剩番 1 支沐浴露   但又唔記得入貨   所以喺媽咪度拎咗 1 Pack 番嚟用   點知依家藍色果樽原來已經無咁香   我覺得直頭無味添呀   又無乜泡   好在我知媽咪喺萬寧買  唔係以為佢買咗假嘢添呀 ~   

菇場唔忙   勁正   因為想抖下   哈哈 ~

Lunch 出去食粥   一入間粥店就 Feel 到寒呀   食完之後都仲係覺得凍   所以我成日同 8 卦講話食粥唔熱   佢唔信我呢 ~

行去百佳買西蘭花   因為拎番菇場無咁核突   哈哈   因為我唔想今晚去街市呀 ~

番到菇場抖陣又 Hea 等放工   爽呀 ~

放工即走啦   番到屋企浸完菜就開機洗衫   抖陣就煮飯喇 ~

我 8 點先開餐   咁啱里奧大人放工   但唔等佢喇   反正又唔駛煮麵   只係食餸同飲湯   好快搞掂   食完可以抖下 ~

是日晚餐 - 西蘭花炒帆立貝 + 煎鯧魚 + 牛大力土伏苓豬骨湯

西蘭花炒帆立貝 - $7.7/2個   其實我覺得依家西蘭花好平   以前無咁平   不過以前好似係好大個   依家係細細個咁囉 ~

煎鯧魚 - 好在前晚記得冰格仲有魚   如果唔係又唔記得食㗎喇   今晚終於清哂   唔駛再記住佢呢 ~   

牛大力土伏苓豬骨湯 - 媽咪話工人煲㗎   又係無咩味   哈哈 ~ 

今晚唔徑步喇   咁開電視就睇到 "樓奴"   聽到里奧大人喺度笑   原來佢話 C 君同個小朋友玩包剪技揼   C 君輸咗就即刻話三盤兩勝   咁再輸就六盤四勝   話勁似我呀   因為次次請食飯   里奧大人一贏   我就會話猜多次   佢一輸就話輸咗要請   所以佢成日話我衰過啲奸商   之後我話呀   我都無同妳六盤四勝啦   點知佢話因為我都唔識   哈哈哈哈   係喎   我真係唔識喎   不過依家識啦   哈哈 ~

好喇   係時候又要填下顏色   如果認真話兩版紙   我估我起碼要兩個半鐘   但我間唔中先填下   都唔知填到幾時   哈哈   真係要比啲心機 lu ~

今晚 11 點瞓喇   最鍾意呢個時間瞓覺   感覺好似可以瞓多啲咁   哈哈 ~