台北。回憶美好記錄 ( FEB 2019 )

( FEB 2019 )

今次農曆新年去台北   對於我哋嚟講都算快閃   因為 1 月頭里奧大人收到公司通知   2 月 4 日 & 8 日都要扣假   咁本身佢星期六又唔駛番   即係可以連放 9 日假   唔出去旅遊好似好浪費咁  但又唔想影響佢開工嘅日子   所以都只能選擇曼谷或者台北   因為太趕啦   無時間做 Research   所以只能去比較熟悉嘅地方呢 ~

咁新年去旅行   一定貴平時一陪   但我都好想去囉 ~

自從媽咪走咗   我極度極度唔想喺香港過年   特別係年初二   咁有年去咗旅行   無同媽咪食開年飯   之後下年就永遠無機會再食   諗起我個心就好痛好痛   所以一到新年就好唔想喺香港 ~

里奧大人知我想去旅行   就即刻上網睇曼谷   想住嘅酒店直頭無房   咁都算啦   揀另一區都可以嘛   但再睇機票   係晚機去早機返   呢下我就唔想喇   前後無咗 2 日喎   所以決定唔去曼谷 ~

之後即揀台北   今次試下住西門町   其實我驚多人㗎   不過唔諗咁多喇   有酒店就訂㗎喇 ~

我只係要求光猛同乾淨   特別係洗手間要乾淨   咁就可以喇   之後里奧大人揀咗 CityInn   我話無問題   其實我都無上網睇間酒店 Comment 同外觀   因為我好相信里奧大人所揀嘅   次次都無令我失望過呢   哈哈 ~

一如以往   訂酒店同機票就由里奧大人負責   我就負責去食去玩嘅地方   今次比較要即興   因為可能好多食店都 Closed   咁我哋又無所謂   去到邊食到邊仲好   無咁大壓力 (其實又無咩壓力   哈哈)   我嘅搵食藍圖都只係參考   我睇咗百幾間食店   但其實我都只係去咗最想去嘅 2 間 ~

今次去台北令我覺得好有新鮮感呀   因為人唔多   店舖又無開   好有新年氣氛   所以特別鍾意影佢地寫住開工嘅日子   里奧大人話點解咁鍾意影 ?!   我話幾難得先影到呢啲呀   真係得新年先影到㗎咋 ~

雖然住西門町   但酒店附近係好寧靜同乾淨   我哋距離最旺嘅地方   只係由捷運站步行 5 分鐘就到   呢間酒店算係旺中帶靜呢 ~

初初對西門町嘅感覺係比較多人   同埋會好嘈   但今次因為新年關係   好多食店無開   所以無咁多人行   要是回復正常   就唔同講法了 ~

天氣方面   6日有 5 日係好天氣   最搞笑係去九份呢日就落雨   但反而我又無所謂   最緊要去到十分唔好落雨就得   因為呢個地方我哋未去過   感謝神   我哋正正去到十分就無落雨 ~

交通主要都係坐捷運   反而我唔係咁鍾意坐的士   因為啲車廂好舊 ~

今次行程唔趕   始終台北去過幾次   無話有咩地方特別想去   純粹想 Hea ~

呢 6 日玩得好 Hea 呀   我感覺好似喺屋企樓下周圍行咁呀   感覺非常之舒服 ~

番到香港   我睇相嘅時候   我一路睇一路話好開心   里奧大人都話好少聽我話睇相會好開心   仲要係台北   哈哈 ~

確實今次去台北真係非常之開心   我覺得去完成個人 Re-fresh 咁呢 ~

機票連酒店: HK$11,361.72 (2人)
旅行保險: 唔記得  
稅項及附加費: HK$1,779.39 (2人)

酒店: CityInn Hotel (新驛旅店西門捷運店) - 經 Expedia 訂
CityInn Hotel Plus Ximending Branch
No. 63, Baoqing Rd., Zhongzheng Dist. Taipei, 100
中正區寶慶路 63 號,  台北市, 100

2 FEB 19 (HKG TO TAIPEI) SAT - CX498
07:10 (1小時35分鐘 (08:45) 到台北)

7 FEB 19 (TAIPEI TO HKG) THU - CX405
17:40 (2小時05分鐘 (19:45) 到香港)