黑椒牛扒 + BBQ 雞翼 + 菜心苗 ( 8-OCT-2023 )

( 8-OCT-2023  SUN )

今朝其實 6 點幾都醒咗   不過繼續懶床都 7 點先起身沖涼 ~

雖然只係每星期食一次豐富早餐   但其實都有啲厭   不過又諗唔到食咩好   哈哈 ~

食完早餐就去里奧大人公司幫手   細細聲一見到我就問我身體點樣 ?!   因為上次佢話見到里奧大人個樣好愁咁   就係我暈咗嗰日呢   所以里奧大人講我情況比佢知   差唔多傾咗 15 分鐘   真係好感激佢咁關心我呀 ~

同阿妹一齊做嘢   紫人話我同阿妹拍埋一齊企   又覺得唔係咁似   但阿妹又講番佢比人認錯喺我   哈哈 ~

諗住走嘅時候   見到皇太后跑嚟我嘅方向   以為佢有嘢要拎   原來佢係過嚟問我隻腳仲痛唔痛 ?!   因為上個月頭佢知我腳好痛呀   估唔到佢記得   之後又傾咗 20 分鐘   我就要去番學喇 ~

番完學就再有事奉   今次事奉係照顧小朋友   其實無咩難度   所以啱我   哈哈 ~

事奉完咗諗住走   點知榴槤同我傾咗陣   鴛鴦又傾咗陣   今日傾咗好多偈咁 ~ 

12 點 40 分掛 8 號風球   所以里奧大人 1 點就放工了 ~

預咗今日打風   所以都會喺屋企整午餐 ~

仲有半個蛋糕   今日食埋去

雖然好味   但一次食咁多真係有啲驚   所以呢件蛋糕食到夜晚   哈哈

食完就抖下啦   最後都瞓咗晏覺   由 3 點瞓到 4 點 ~

睇下 Youtube   差唔多 6 點半就預備晚餐  ~

7 點掛 9 號風球   之前又話打唔成風   過多日又話打得成   依家天文台真係唔多可信咁 ~

雖然今晚只係焗嘢同淥菜   但都搞咗成個鐘先食得 ~

是日晚餐 - 黑椒牛扒 + BBQ 雞翼 + 菜心苗

黑椒牛扒 - 買咗 2 塊牛扒   咁里奧大人聽日可以有 lunch box   不過都仲有剩啲牛扒   又要留番第晚食了 ~

BBQ 雞翼 - 特登買定多啲㗎   所以連食幾餐雞翼   哈哈 ~

菜心苗 - 終於清哂喇   下次都係買 1 斤就算喇 ~

洗埋碗就開機洗衫   之後沖涼休息 ~

同里奧大人睇 "思家大戰"   佢睇完就做功課   我就仍然睇電視 ~

終於清哂榴槤冰皮月餅   下次應該未解凍之前切   咁樣賣相好睇啲   但未解凍又硬到石頭咁   真係好難搞   哈哈

似乎聽朝都應該放風假   不過我都係 10 點半都瞓覺呢 ~