聚興樓 @ 紅磡 ( 17-OCT-2023 )

生炒上肉排 - 仍然咁好味   但今晚少咗啲汁

清蒸海上鮮 - 今次係豉汁蒸鯧魚   我同里奧大人話如果係第啲魚就好啲   因為呢樣我識煮   里奧大人好愕然咁話妳識煮 ?!   我話唔係嘛   煮過好多次啦

蒜蓉炒通菜 - 今次要少油

梅菜扣肉煲 (+$68) - 里奧大人話得 4 片扣肉   我話梅菜先係重點   食剩大半碟   里奧大人可以帶飯了

我鍾意飲雞腳湯   但自己一定唔敢煲嚟飲

如果我每晚煮到 4 餸 1 湯就好喇   哈哈哈哈

( 17-OCT-2023  TUE )

感恩一覺瞓天光呀   如果日日係咁就好喇 ~

早餐都係食多穀英國方包   一袋 6 片分開兩餐食真係非常好 ~

菇場唔忙   可以抖下 ~

Lunch Time 出行下   但好大風呀   諗住行街會無咁凍   點知一樣咁凍   哈哈 ~

今日又好想食雞翼酸辣米線   但今次好多酸菜   所以好酸呀   不過咁都好   食完唔駛咁滯 ~

仍然唔忙   傾下偈就放工了 ~

里奧大人要去整嘢   咁我放工去睇中醫喇 ~

6 點半左右就到我睇   我話呢幾個月都好攰咁   同埋無氣   腰又痛   佢話我係肝鬱同神經痛   話我個腦成日處於興奮同緊張狀態   我都唔明有咩可以成日令我咁興奮   哈哈 ~

我再講埋上次我肚痛到暈   佢話呢種肚痛係突發性緊張或者疲勞都會   咁我肯定係突發性緊張啦 ~

咁佢解答完病因   佢問我一日想飲幾次藥 ?!   我話你話事啦   佢話一日兩劑   我話無問題呀   咁我起身走啦   之後佢話未走得呀   所以妳咪緊張囉   原來佢係問我叫咩名 ?!   佢要寫喺藥單上面   但真係好少最尾先寫名家嘛   咁咪以為問完點飲咪走得人囉 ~

睇完就番屋企   同里奧大人差唔多時間到食店   因為我行 short cut   佢就喺我隔離過兩個身位   佢以為我特登唔理佢   但係我真係無留意佢   後尾我行行下望下後面   先睇到里奧大人呢 ~

食完就番屋企喇   開埋機洗衫就沖涼 ~

里奧大人嘅午餐有珍珠奶茶   佢話叫咗多珠   所以留比我   不過我話唔好再買燒餅同珍珠奶茶比我喇   我想停一停   哈哈

熨完 1 機衫就睇 Youtube   今晚接近 11 點先瞓呢 ~