鎮江排骨 + 螺片燜鵝掌 + 乾燒伊麵 +油麥菜苗 ( 22-OCT-2023 )

( 22-OCT-2023  SUN )

今朝同里奧大人食早餐   之後就去佢公司幫手 lu ~

做完嘢就同阿妹喺 Pantry 傾密偈   大家又再進一步了解對方   哈哈 ~

我番完學又再去事奉   差唔多 1 點先走   咁我買完餸都即番屋企   沖埋涼就整午餐 ~

尋日喺十二味食剩嘅午餐   再加兩片豬肉乾同涼茶   夠哂飽啦

里奧大人話本身每人 1 件曲奇餅   但皇尚同勁哥比埋里奧大人   佢話佢要將所有零食全數上繳比佢老婆   笑到佢哋痴咗   里奧大人再強調唔好問佢好唔好食   因為佢無食   之後勁哥話你都唔食就唔好嘥嘢   比你老婆食仲好   哈哈

食完就睇下 Youtube   里奧大人就瞓陣覺 ~

4 點幾開始攰攰地   但瞓又瞓唔到   咁開機洗衫同熨衫啦 ~

啱啱正想問家姐做緊啲咩 ?!   佢就打嚟問知唔知佢喺邊 ?!   我話紅磡囉   佢好愕然問點解我會知 ?!   我話妳次次打得嚟   就肯定係喺我附近囉   上次喺新蒲崗又係咁 ~

之後又叫我唔好去食咁多十二味   佢依家好驚我食完麻辣之後會暈呀   我話食麻辣都只會去十二味㗎喇   始終食咁多次都無事呢 ~

差唔多 6 點預備晚餐   但 7 點先可以開餐 ~

是日晚餐 - 鎮江排骨 + 螺片燜鵝掌 + 乾燒伊麵 +油麥菜苗  

鎮江排骨 - 唔醒起里奧大人無餸   所以整個鎮江骨   但食咗幾嚿咋   之得唔整啦 ~

螺片燜鵝掌 - 尋晚飲宴打包㗎   今晚食都仍然覺得好好味 ~

乾燒伊麵 - 里奧大人話碟伊麵係無料係無味   所以好在我加咗條魚片   同埋我諗住蘸豆板醬   所以唔加生抽老抽炒囉 ~ 

油麥菜苗 - $15/斤   每晚半斤都夠食   因為食鵝掌都好滯下 ~ 

洗埋碗就沖涼   8 點半準時同里奧大人一齊睇 "思家大戰"   次次估啱咗真係好開心   哈哈 ~

里奧大人之後做功課   我就睇 Youtube ~

今晚有啲攰   所以 10 點 45 分都瞓覺 lu ~