土魷北菇蒸肉餅 + 涼瓜炆排骨 (外賣) ( 3-OCT-2023 )

呢個肉餅好味呀   唔會係乾爭爭咁

( 3-OCT-2023  TUE )

今朝起身整完早餐   突然間搞肚痛   一坐喺馬桶   我其實已經感覺天旋地轉   所以我將個頭貼近牆   起碼有啲嘢頂住 ~

我應該坐喺馬桶唔夠 5 秒就暈咗   里奧大人話佢搵緊衫嘅時候   聽到廁所有好大聲嘅 "her her her" 聲   以為係抽氣扇發出嘅聲   所以即入廁所睇下   見我伏咗喺牆同埋發出 "her her" 聲   但又繼續大號緊   佢以為我玩呀 ~

咁到我醒番之後   我見到里奧大人喺我隔離扶住我   之後佢話我頭先暈咗幾十秒呀   再唔醒就會 Call 白車 ~

咁我講番   頭先我開始有知覺嘅時候   我個頭係超級超級勁痛   感覺有個男人隻前臂喺我塊臉度係咁叫我   我嗰一刻仲諗緊係咪叫我起身番工?!   但我又記得自己起咗身同整咗早餐喎   所以就勁頭痛喇   唔知發生咩事咁 ~

里奧大人叫我唔好番工   話一陣再暈咁點算 ?!   我話睇下點先啦   不過之後再隔半個鐘都仲係有啲搞肚痛同暈   所以都係同西瓜請病假呀 ~

打去診所掛號   感恩 10 點 45 分有得睇   咁我喺梳化瞓陣   因為一灘平瞓覺就好暈 ~

10 點左右起身食早餐   其實只係咬咗兩啖   叫做有啲嘢落肚咁囉 ~

里奧大人就要番公司整啲嘢   搞掂哂就再陪我去睇醫生 ~

10 點半去到診所   咁里奧大人就要去拎機   我睇完就再等佢一齊食 Lunch ~

11 點鬆啲到我喇   同醫生講完頭先發生嘅嘢   佢再摸下我個肚   好在我無痛咋   之後好平淡咁話我係休克   有啲人係咁   佢話做多啲運動等身體好啲   所以開啲腸胃藥比我就得喇 ~

拎埋藥都已經 12 點   咁啱里奧大人嚟到診所接我 ~

我話我又啲餓呀   所以想食埋午餐先番屋企 ~

今次真係感覺執番條命仔   真係唔敢再食咁多辣喇 ~

見月香蔥牛肉丼 ($58) - 唔想食滑蛋   所以食牛肉

咖哩玉子丼配氣炸雞球 ($68) - 里奧大人最鍾意咖哩汁   所以我要幫佢食炸雞呀 

日式湯 & 日式前菜   沙律菜好新鮮又夠凍   麵豉湯又夠熱   呢兩個反而最驚喜   哈哈   

我覺得辛辣檸檬薑汁好似洗潔精嘅味道   燒肉汁就最 OK

食完即番屋企   咁我哋等緊過馬路嘅時候   居然見到阿妹同細細聲辣椒仔喺餐廳食嘢   之後 3 個一齊拎手機出嚟影我哋   呢下搞笑   未見過我哋一齊嗎 ?!   哈哈 ~

阿妹話里奧大人頭先做嘢都無厘心機咁   不過我都信佢擔心我嘅   佢都第一次見我咁暈嘛   所以今朝佢食完早餐就即刻上網搵防撞牆貼 ~

番到屋企都 1 點幾   沖埋涼就食藥   其中一隻藥係會令人昏昏欲睡   所以話咁快就瞓到   瞓到 3 點幾呀   最搞笑里奧大人同我一樣坐喺梳化瞓 ~

醒咗又睇 Youtube   不過 4 點又要食藥   食完又再瞓   哈哈哈哈 ~

雖然醃咗肉   但今晚都唔煮喇   所以叫里奧大人去買外賣   咁 7 點就可以開餐呢 ~

食完抖陣就沖涼   之後食埋藥就休息 ~

今晚 10 點都瞓覺   所以真係只能唔番工先敢食藥   食完藥就可以成日瞓都無問題囉 ~