金坊泰國美食 @ 紅磡 ( 25-OCT-2023 )

精選2人餐 ($268)

碎肉生菜包 - 我以前好抗拒薄荷葉嘅味道   所以食泰菜唔會食碎肉生菜包   但今晚想再試下   估唔到會覺得好好食   年紀大喇   口味真係開始變   哈哈哈哈

椒鹽魷魚 - 個漿唔夠脆身呀   唔係就更加好味啦

好似豬大腸

香葉肉碎飯 - 我好飽呀   所以無食到   剩咗大半碟就打包   聽晚可以再食

芒果沙冰 ($28) - 正價飲品買 1 送 1 就好抵喇   所以一定飲芒果沙冰   因為我哋鍾意飲

食唔哂碟炒飯同埋少少魷魚   本身諗住 1 個盒裝唔哂   估唔到又裝得哂   我仲用塊生菜分隔咗飯同魷魚   太有材啦    哈哈哈哈

( 25-OCT-2023  WED )

其實尋晚瞓得唔錯   但醒一醒之後就好難瞓得番囉 ~

今朝叫里奧大人買餐蛋治   間唔中咁食都唔錯   唔駛整早餐真係慳唔少時間呢 ~

菇場唔忙   做下自己嘢 ~

今日菇場同 8 卦搞 Farewell Lunch   差唔多 12 點半先開始   開心開心 ~

開餐

肉醬意粉   因為即製   所以好好食呀   但8卦同阿齋唔食芝士   所以走芝士   估唔到無芝士都好味喎

越南春卷 - 我食咗 3 件   香口嘢真係特別好食   哈哈

鮮蝦什果沙律 - 又係好味   我同阿花講話整沙律好花時間   今日要食多啲

薯仔沙律 - 呢個勁好味   因為我鍾意有啲洋蔥粒

雞翼 - 好入味   呢間外賣真係唔錯

唔知咩菇意粉   不過我無食呀   其實食完薯仔沙律都幾飽下   哈哈

雜菜沙律 - 無食呀

雞扒 x 2 - 無食呀

西瓜同 8 卦個女講班姐姐同妳玩   佢個女問邊班姐姐 ?!   哈哈哈哈   我哋話係班姨姨啦   所以阿女咁嘅反應囉   笑死 ~

食食下收到里奧大人電話   佢叫我打番比家姐   嚇得我以為咩事   所以即打番比佢   佢話見我 Whatsapp 得一個剔   所以喺群組問我係咪唔舒服 ?!   我其實唔知 Showroom 係收唔到 Wifi 囉 ~

我覺得開大食會好過去飲茶   咁樣可以同個個都傾到偈嘛 ~

同 8 卦做咗 15 年同事   曾經鬧交同無彩佢半年   之後又無事做番好同事   咁佢做同事真係 101 分   永遠唔會托手爭   又成日 share 好多嘢比我   我唔舒服就次次問有無事   尋日諗住抱佢個女   佢驚我手痛   我真係完全唔記得過我手痛呢回事   所以我成日話佢衰唔哂   哈哈 ~

食到 1 點半左右就開工啦   個個仲係興奮狀態   哈哈 ~

4 點幾食散水餅   今次真係慢慢食   雖然朱古力真係好甜   但我又好想食朱古力 ~

好濃嘅朱古力味   但食完有啲漏   哈哈

臨走同 8 卦講再見   其實我都有啲眼濕濕   所以講多兩句就走   反正其實 Whatsapp 可以聯絡   唔想搞到咁傷感 ~

最搞笑里奧大人問我有無喊 ?!   本身我都諗住會喊㗎   始終真係唔捨得嘛   同埋里奧大人話每次提到 8 卦唔做   我就會即刻眼濕濕   所以佢話我無喊真係估唔到喎 ~

今晚睇中醫好順利   等咗 1 個就到我   醫師話我係調理身體   基本上唔駛睇得咁密   咁又好喎 ~

本身一坐低已幫我把脈   咁到我諗住走   佢又突然叫我把多次脈   我話係咪頭先心跳太快呀 ?!   佢又話唔係   之後叫我飲藥唔好咁快  唔係吸引唔到   差唔多 10-15 分鐘內飲 1 杯就可以 ~

拎埋藥就走人   里奧大人仲諗住接我   佢都無諗過咁快呀 ~

叫里奧大人喺附近等我   好在之前成日同佢行呢度附近   咁佢就有印象喇 ~

諗住去居酒屋食壽司   但里奧大人都唔係咁想   所以食家鄉菜啦   哈哈哈哈 ~

食完就去買麵包同 AEON 買糖水   買完都番屋企喇 ~

開埋機洗衫就沖涼   抖陣再熨衫   之前我鍾意儲埋兩機一齊熨   里奧大人就鍾意逐機熨   話唔駛熨咁多   依家到我鍾意逐機熨喇   都係最多熨 8 件衫   再熨埋底衫褲鞋襪浴巾   如果嗰機無里奧大人嘅裇衫要熨   真係 15 分鐘可以搞掂 ~

睇多陣 Youtube 又打陣機   今晚 11 點先瞓 ~