咖哩陳皮魚蛋 + 辣汁焗雞下肶 + 菜心苗 ( 16-JAN-2024 )

( 16-JAN-2024  TUE )

感恩一覺瞓天光呀   臨醒前係咁發夢   有個夢係我同家姐喺婆婆屋企住三晚   臨走嗰日仲要打麻將   之後鬧鐘響喇   次次起身前發夢   起身嗰下係濛濛瀧瀧咁最辛苦   哈哈 ~

我依家急步行嘛   點知轉身時 Click 一 Click 腳   個人係咁打斜要跌㗎喇   但勁唔想跌落地嘛   不過點拗都拗唔番直   所以最後都跌咗   CCTV 實睇到啦   哈哈哈哈   今次真係勁樣衰 ~

我同里奧大人講話頭先跌親呀   所以叫佢睇下我隻手腳有無損咗同瘀咗囉   但感恩無事   之後佢話一陣做埋空中飛人就慘啦   我話下次小心啲㗎喇 ~

早餐食甜餐包夾芝士   里奧大人就食衛星包夾芝士肉鬆 ~

菇場唔忙   又做自己嘢 ~

Lunch Time 出去行陣再食墨魚丸米   食完充滿力量就去買嘢 ~

去 759 買百邦朱古力餅比里奧大人   再去一田買迷你秀珍菇同手打烏冬   之後去北京同仁堂買石斛粉   最後去埋韓印紅買韓國辣椒醬同調味粉就走喇   半個鐘買咁多嘢   效率都幾高   哈哈 ~

仍然唔忙   舒舒服服等放工 ~

放工即走   番到屋企即預備晚餐喇   里奧大人 6 點幾先番到嚟   不過仲未食得呢 ~

是日晚餐 - 咖哩陳皮魚蛋 + 辣汁焗雞下肶 + 菜心苗

咖哩陳皮魚蛋 - 星期日整㗎   今晚點都入味啦   哈哈哈哈   我問里奧大人啲魚蛋有咩味 ?!   佢話食到陳皮味   上次喺成興隆買㗎   下次再去必定要入貨呀 ~

辣汁焗雞下肶 - 想有啲配菜   所以買包迷你秀珍菇   一田只係買 $13.8 咋   今次啲雞肶唔辣呀   我仲喺度諗明明用辣汁醃   個汁應該係橙色   但醒起有落老抽   可能多得滯   變咗啡色 ~   

菜心苗 - 一斤分三餐食   食埋聽晚先食完 ~

里奧大人晏晝已經唔係咁舒服   食得唔多   之後我話唔舒服要出聲話我知嘛   咁我唔煮雞肶   依家又食剩一個餸   佢話驚我擔心   我話你覺得夜晚知你唔舒服   咁樣就會無咁擔心 ?!   我一樣係咁擔心囉   之後我洗完煲再食   見佢食緊嘢   原來係食粒魚蛋   咁就好喇   即係都叫做想食嘢嘛   哈哈 ~

洗埋碗就開機洗衫   里奧大人唔係咁舒服   所以唔做運動   不過我都唔敢做住   今朝趺親   條腰有啲痛呀 ~

清淨園小銀魚調味 ($24) - 用嚟做湯底都唔錯咁   貪佢夠方便

讚岐手打烏冬 ($32.9) - 希望煙韌啦   哈哈

北京同仁堂嘅石斛粉 (原價 $420)   8 折就 $336   其實都算抵   下星期先開始飲   不過起碼飲幾盒先有功效呢   

沖埋涼就熨兩機衫   熨完已經 9 點   真係有啲攰喇   哈哈 ~

睇下 Youtube 又打下機   今晚里奧大人 10 點 15 分就瞓覺   我其實都好眼瞓   所以 10 點 25 分都瞓覺喇 ~