蒜蓉豆豉蒸排骨 + 西蘭花 ( 25-JAN-2024 )

( 25-JAN-2024  THU )

感恩瞓得都唔錯   感覺 6 點左右起咗身咁   不過我無睇鐘   總知個天就係未光嘅 ~

咁繼續瞓啦   如果 7 點起身就做運動   無醒就瞓到 7 點 25 分   不過我 7 點 15 分都醒咗   咁起身整早餐喇 ~

呢排要煲薑茶比里奧大人帶番公司飲   所以早啲起身都好呢 ~

尋日早餐食唔落嘅丹麥酥   咁就成為今朝嘅早餐喇   再加多件窩夫   咁就夠哂飽啦 ~

里奧大人話食咗蕃薯糖水   個胃好似好啲咁   我以為佢話朝早想食添   原來話夜晚想食   咁難得佢有嘢想要我煮   我實煮嘅   最緊要唔難   哈哈 ~

菇場忙呀   所以時間過得勁快 ~

Lunch Time 出去行陣   食完鯪魚球米就再行陣   最後買埋蕃薯同麵包就番菇場喇 ~

里奧大人今日中午放假   佢話上司趕咗佢番屋企   要佢番屋企休息呀 ~

基本上全公司都知里奧大人好忙   同埋休息係唔夠   就算放假都會搵里奧大人   所以今次里奧大人唔舒服   真係個個都叫佢多啲休息   感激佢哋嘅體諒同代禱 ~

忙到 3 點就搞掂   輕輕鬆鬆等放工 ~

放工即走   番到屋企都即預備晚餐同蕃薯糖水喇 ~

是日懶餐 - 蒜蓉豆豉蒸排骨 + 西蘭花

蒜蓉豆豉蒸排骨 - 里奧大人話個汁好味   仲食得好快添呀   咁即係有胃口啦   感恩感恩   佢仲話尋日係最有胃口嘅一日   咁又係呀   我都見佢自己有夾餸食呢 ~

西蘭花 - 一個份量啱啱好   始終我食西蘭花係比較頂胃   唔可以食得太多㗎 ~

洗埋碗就去屈臣氏   上次扣多咗錢呀   不過今晚都未拎得   真係好煩囉 ~

番到屋企即開機洗衫   之後沖涼休息喇 ~

一路食蕃薯糖水   一路睇 "長命百二歲" 同 "無垠之彊" ~

睇完就再睇下 Youtube   今晚真係特別攰咁   我 10 點已經喺梳化瞓咗   瞓到 10 點半就比里奧大人叫我入房瞓   好在都瞓到咋 ~