臘腸潤腸拚臘肉 + 粟米拚菜心苗 ( 17-JAN-2024 )

食剩嘅咖哩魚蛋   今晚點都要食埋去㗎喇

( 17-JAN-2024  WED )

感恩一覺瞓天光呀   今朝 6 點 45 分醒咗   所以都起身做運動喇 ~

里奧大人唔係咁舒服   所以佢晏啲番工   咁我自己食早餐先喇 ~

早餐食牛油排包   搽咗花生醬果占都好食   但甜咗啲   哈哈 ~

肥仔豪着短袖 Tee   佢話今日好熱好濕   我話反而覺得今日凍咗喎   同埋可能尋日無着外套   中午一出去   真係凍到腳震囉   所以今朝點都要着件外套呀 ~

阿齋之前咳   想睇醫生都無得睇呀   因為診所爆哂   要另一日先有得睇   仲要係最後嗰個   依家流感高峰期   好多人睇醫生   船頭同阿後都話依家多人戴番口罩   始終流感唔係普通感冒   真係要小心啲呢 ~

Lunch Time 行陣就去食白粥 + 炸兩   本來諗住食炒麵   但又好飽咁 ~

家姐一唔喺屋企   呢隻 Berry 女就第一時間上床瞓   幾咁識嘆呀

唔忙就做自己嘢啦   咁就好快放工㗎喇 ~

放工即走   里奧大人接近 7 點先番到屋企   咁啱差唔多時間可以開飯呢 ~   

是日懶餐 - 臘腸潤腸拚臘肉 + 粟米拚菜心苗

臘腸潤腸拚臘肉 - 諗唔到住咩   突然醒起有臘味   咁即蒸嚟食啦   方便又好味喎 ~

粟米拚菜心苗 - 終於清哂   以前好鍾意食粟米   依家只係間唔中先食 ~

洗埋碗就開機洗衫   今晚都唔做運動住   所以沖涼休息喇 ~

叻叻生日請全公司食蛋糕   里奧大人唔食   所以阿妹特登留比我㗎

豬腰芒皮薄又甜   間唔中去唔同生果舖買嘢都唔錯   每間有一樣好嘢都好   哈哈

里奧大人同事嘅手信   呢排成日睇新彊節目   今日有得食新彊特產   開心開心

睇睇下 Youtube 都想瞓   里奧大人之後幫我蓋張毛毯   直頭瞓埋添   醒嘅時候已經 10 點 40 分瞓啦   咁即入房瞓喇 ~