臘潤腸蒸排骨 + 蒜蓉蒸節瓜 ( 22-JAN-2024 )

尋日食剩嘅午/晚餐   今晚一定要食埋去喇

( 22-JAN-2024  MON )

今朝應該 6 點左右醒咗   但唔做運動住   所以繼續瞓   但瞓得麻麻哋 ~

鬧鐘響就起身   終於覺得好凍喇   哈哈 ~

咁我換衫嘅時候   里奧大人叫我幫佢切定薑絲   咁佢起身可以煲   即係佢都鍾意飲啦   實在太好 了 ~

其實我沖完涼已經即刻煲啦   始終飲薑茶都好嘛   所以一定煲比佢呢 ~

早餐食芝士條   今次啲 Size 都幾平均   哈哈 ~

菇場忙呀   開心開心 ~

里奧大人 Send 咗細細聲老公嘅代禱 Whatsapp 比我睇   真係好感動呀   感恩里奧大人所有同事都好錫佢同我   感謝父神 ~

Lunch Time 等 Lift 嘅時候   阿齋見我見褸無扣到鈕   話咁樣好凍㗎   之後即刻幫我扣埋粒鈕   勁似里奧大人呀   哈哈 ~

未餓又行陣先啦   食完鯪魚球河就去買麵包   買完就去 Mikiki 行下 ~

見到其奧   諗住唔買啦   但都要話比家姐知其奧擺檔   估唔到佢想食蝦子花生同花生糖   之後佢買我又買   買下買下又一大袋   仲要幾重下   哈哈 ~

再見到酸薑同陳皮   咁就啱哂喇   因為可以買比里奧大人   之後又問家姐要唔要   佢又話要   真係好彩次次我想買咩   我都問佢要唔要咋   如果我無問佢而佢又想要   我會好激氣㗎 ~

經過商場   聽到前面個門口方向   有個男人大叫阿姐阿姐   原來係坐輪椅嘅伯伯想出嚟   但對門開到一半就開唔到   好奇怪啲人經過都唔幫囉   咁講真   如果對門無開   入面有人叫   我係唔敢入去嘅   但點都會搵商場職員啦   大叫就一定係想人幫嘛 ~

番到菇場   阿齋即問我買咗咩 ?!   我話妳又知我買嘢咁叻嘅 ?!   佢話聽到我入嚟嘅時候有 "Sit Li Sa La" 聲呀   哈哈 ~

我話喺其奧買咗嘢   佢話買咁多 ?!   我話買比家姐㗎   佢講咗幾次話妳真係好錫妳家姐   次次買嘢都話買比家姐   咁我話家姐都好錫我嘛   佢話咁我都知   因為我都成日話係家姐買比我㗎   哈哈 ~

菇場仍然忙呀   不過忙到 2 點就搞掂 lu ~

放工即走   番到屋企都預備晚餐喇 ~

是日懶餐 - 臘潤腸蒸排骨 + 蒜蓉蒸節瓜

臘潤腸蒸排骨 - 買咗 $40 新鮮排骨   今晚蒸少少食先   肉質真係唔 "鞋" 㗎   哈哈 ~   

蒜蓉蒸節瓜 - 之前買兩個   但其中一個發咗霉咁   激死我呀   一餐食一個節瓜真係太少啦 ~

洗埋碗就染頭髮   係里奧大人叫我染㗎   依家食藥真係多咗好多白頭髮   最搞笑佢話我擔心佢   搞到白頭髮都多咗   我話有關咩 ?!

染完就再沖涼洗頭   之後就開機洗衫喇 ~

黑芝麻花生脆糖 ($60/2包) / 魚皮花生 ($22) / 南瓜子脆糖 ($60/2包) / 蝦子花生 ($25)

香辣魚柳 ($35) / 油角皇 ($45/半磅) / 牛耳 ($22) / 崩沙 ($25)

呢幾包係比家姐嘅

陳皮黑糖薑 ($20) & 古香陳皮 ($20)   買五送一

睇陣 Youtube   再同里奧大人一齊睇 "肉肉大搜查"   睇到 10 點 45 分都瞓覺 lu ~