豆豉鯪魚油麥菜 + 白灼蝦 + 粟米蛋花湯 ( 14-MAY-2014 )

( 14-MAY-2014  WED )

今朝啲雨落下停下   一出大堂就落雨啦   點知一行到入商場就停雨   之後買完麵包又落雨   到我上車又停雨 ~

早餐食腿蛋治   因為想飽啲   咁可以頂到晏晝去入埋票先食 Lunch ~

番到菇場一開 Email   人事部話每日要依時 9 點番工   話有部份同事有多次遲到記錄   咁我知佢講邊個啦   因為佢成日番 9 點半   之前兩日仲番 9 點 40 分添   真係好離譜囉   不過佢其實已經叫做早咗㗎喇   我初初入嚟做   佢直頭番 10 點添呀   我覺得佢好勁啦   咁大膽番 10 點   老闆佢哋都係 9 點前番到嘛   咁我依家都要準時番工 lu ~

又係忙   忙到 12 點就可以抖下   今日好開心呀   家姐陪姐夫做物理治療所以請假   10 點幾做完就番屋企   佢話姐夫瞓咗覺   所以出嚟同我食 Lunch 呀   哈哈 ~

問佢想食咩   佢話想食酸辣米線   又酸辣米線   哈哈   不過佢都驚我又食   所以想食其他   但又諗唔到想食咩   最終都係食番酸辣米線   梗係啦   佢成日聽我講話好辣   所以佢先想食囉 ~

豬腩肉酸辣紅薯粉 - 食到咁上下   我就同家姐講   話食咁耐米線   第一次有花生咋   佢即刻睇 Menu   話酸辣紅薯粉係有花生㗎原來   但酸辣米線就無   咁我無比到花生佢呀   我以為佢都有花生嘛   之後佢話其實好想食啲花生   好似脆卜卜好好味咁   但見我無比佢所以唔食喎   黐線㗎   想食就講吖嘛   再唔係咪自己夾囉   怕咩喎   不過佢應該覺得我鍾意食   所以唔夾啦 

豬腸酸辣米線 (大辣) - 我覺得辣   家姐話一啲都唔辣

越式炸春卷   估唔到係蘸喼汁   不過我叫佢比碟泰式醬囉   味道好似夾啲咁

食完就行一田   再去 Panash 買包同美心買蛋糕   佢就滿載而歸喇   不過我對麵包蛋糕真係興趣不大   之後就分道揚鑣喇   我唔送佢搭車喇   因為已經遲咗幾分鐘番菇場呢 ~      

2 點幾家姐打嚟   把聲好似喊咁   比佢嚇死呀   原來佢話姐夫同佢飲茶呀   因為佢好飽   食唔落嘢   但姐夫講到好似陪佢食嘢咁   咁唔去唔得啦   哈哈 ~      

放工去街市買餸   成日想買與唔想買之間   之後走咗又想買   所以用咗 Double 時間買餸添 ~

番到屋企放低袋即入廚房博殺喇   之後抖陣就煮呢   今晚自己食先   所以 7 點半可以開餐   算快啦 ~

是日懶餐 - 豆豉鯪魚油麥菜 + 白灼蝦 + 粟米蛋花湯  

豆豉鯪魚油麥菜 - 之前啲油麥菜係 $6/斤   依家 $10/斤   同埋唔係檔檔有得賣添   可能唔當造喇   不過勁想食   所以買囉   嗰 3 隻紅尖椒都要 $5   咁食菜真係抵好多呀   哈哈 ~ 

白灼蝦 - 又係無啦啦想食   所以買一份份 $20 嗰啲   但都幾爽口喎 ~     

粟米蛋花湯 - 上星期已經想飲啦   哈哈   話時話   今餐樣樣都係勁想食囉   所以覺得好好味   不過好在樣樣都唔駛醃   唔係就唔整咁多樣嘢 lu ~

里奧大人 8 點 15 分番到屋企   都算早㗎喇 ~

洗埋嘢都 9 點幾   要即刻沖涼啦   忍咗好耐喇   哈哈 ~

今晚又 11 點幾先瞓   不過係自己想睇埋電視 Relax 下咁先瞓囉   如果唔係可以再早啲瞓嘅 ~