單骨雞翼 + 臘腸炒娃娃菜 ( 21-MAY-2014 )

( 21-MAY-2014  WED )

起身一拉窗簾   又見到好多黑雲   又會落雨喇 ~

食完早餐就睇報紙   之後拎杯嘢飲時見到渠王原來同我一張枱   佢坐咗喺我隔離嘅對面   諗住扮見唔到   佢同我講嘢我都扮聽唔到   因為我睇緊電視   之後佢再大聲啲同我講嘢   咁唔應佢唔得啦   最煩係次次都講 8 卦同佢老婆放假會點點點   關我鬼事咩   佢應該以為我同 8 卦無咁熟   因為我同 8 卦好少再一齊食 Lunch 嘛   但其實我哋成日都 Skype 傾計囉   知嘅嘢多過佢啦   講真   8 卦個人除咗 8 卦縮骨小家之外   其實佢做嘢都 OK 嘅   起碼唔會推三推四   最緊要解決問題先   因為菇場有部份同事最鍾意小事化大   好煩囉 ~

菇場唔忙實在太好喇   呢排唔多想做嘢咁   哈哈 ~

依家坐對面嘅新同事成日講嘢好大聲   雖然隔咗條河   仍都有 Partition   但佢都講嘢好大聲囉   大大聲話自己係一個好租客   講到絕世好租客咁   原來係佢每星期都會抹屋一次   咁叫做好租客喎   真係笑大人個口啦   間屋不論係租定買   妳自己住嘅都要清潔㗎啦   唔好講到係幫屋主清潔咁先得㗎   不過呢個同事都係煩㗎喇   好在我一早知   所以唔會同佢點講嘢呢 ~           

Lunch Time 同 PMS 出去食   好在佢咩都食   唔係好難夾到   哈哈 ~

媽咪 3 點幾打嚟話唔駛食糖尿藥   同埋轉另一隻心臟藥   實在太感恩喇   好在媽咪真係肯戒口同做運動   所以控制得好好   如果唔係就手尾長㗎喇 ~

放工去超市買魚露同麻油   之後就番屋企喇   勁餓呀   不過要醃雞翼   所以想快啲食都唔得添 ~

搞掂哂都 7 點半 lu   又係自己食先   今晚我食泰國米粉   等里奧大人番嚟再煮泰國冬蔭功麵佢食 ~  

是日懶餐 - 單骨雞翼 + 臘腸炒娃娃菜  

單骨雞翼 - 扮泰國嘅單骨雞翼   不過當然無咁好味啦    哈哈   我用魚露 + 老抽 + 糖醃半個鐘咋   焗完之後唔上色   所以再搽蜜糖再焗   咁就靚仔啲   但變咗蜜糖雞翼   哈哈   同埋我驚 d 魚露好鹹   我唔係落好多咋   我覺得無咩味   但里奧大人話 OK   我覺得魚露好似臭腳味囉   咁我焗雞翼嘅時候   我坐喺梳化睇雜誌   但就聞到啲魚露味   久久不散咁   我仲以為自己洗唔乾淨隻手添   但其實我隻手係無掂過魚露㗎噃   之後再諗諗   原來焗緊雞翼   咁啲臭腳味都好勁下噃   真係要買支靚嘅魚露先得   啲臭腳味焗住間屋到   好難頂家嘛   哈哈 ~  

臘腸炒娃娃菜 - 第 2 餐食娃娃菜喇   咁要搞 d 新意思啦   唔係驚里奧大人悶   咁我就煎香啲臘腸   再加海皇醬一齊炒   估唔到啲味道又好夾喎   呵呵 ~

搞掂哂抖多陣就沖涼   之後睇下雜誌   唔想郁呀 ~

里奧大人今晚 9 點先放工呀   佢一聽到話食麵就好開心呀   但今個星期食 3 餐炒麵又話唔想再食   咁就唔係鍾意食麵啦   係睇下食咩麵先啱囉 ~

等埋佢食   10 點半洗埋啲碗   感覺有朝做到黑咁   哈哈 ~