燻蹄 (外賣) + 粟米蛋花湯 ( 22-MAY-2014 ) + ( 23-MAY-2014 ) + ( 24-MAY-2014 ) + ( 25-MAY-2014 )

( 22-MAY-2014  THU )

今朝食飽啲   因為 Lunch Time 要去一田超市掃貨呀 ~

所有大粒都唔喺度   但菇場都一樣係靜英英咁呢 ~

12 點半即去一田超市   真係超勁多人呀   我目標清晰   同埋知道啲嘢放喺邊個位   所以都好快買好哂   咁 1 點 10 分排隊啦   都知條龍好長㗎喇   不過估唔到條龍係轉彎又轉彎   轉極都唔見家鄉   之後排排下渠王同 PMS 佢哋見到我   就叫我過去排   因為佢哋都買咗 3 架車   咁我都唔客氣走過去喇   因為咁樣慳番起碼半個鐘嘛   買完都已經 2 點   因為我買咗好多嘢   所以 8 卦幫手拎   我又幫佢哋拎啲咁囉 ~

咁好啦   番到菇場 Check 下張單   點知原來佢計多咗 4 支黑胡椒   收多 $99.7 呀   所以我又要去番一田拎番啲錢   攰鬼到呢   2 點半終於可以坐定定喇 ~

佢哋叫 Tea   不過我唔無叫   因為我有哂策略家嘛   就係朝早喺聖安娜買定個吞拿魚燒餅   不過唔知係咪太攰   所以無咩胃口  差唔多 3 點半先想食呀 ~

放工去旅行社拎資料   番到屋企已經 6 點半   超勁攰   本來想等埋里奧大人一齊出去食   但佢又唔知放幾點   咁我又想沖涼先   所以我最後都去太興買燻蹄番屋企算喇 ~

呢排真係勁攰呀   番到屋企先知原來今日已經係星期四   仲以為今日係星期三添 ~

我又未餓   所以沖咗涼先   之後再飲咗粟米湯   咁等埋里奧大人番黎先再食餸   佢 9 點幾先番到嚟   食完都已經 10 點半   好夜啦 ~   
      
是日懶餐 - 燻蹄 (外賣) + 粟米蛋花湯 

燻蹄 (外賣) - 我好鍾意食燻蹄㗎   蘸埋 d 蒜頭醋真係好好味呢 ~

粟米蛋花湯 - 鍾意飲就好飲喇   哈哈   其實係我驚買完之後唔想飲   擺下擺下又過期咁呢 ~

夜食就一定夜瞓㗎啦   所以今晚 12 點先瞓呀 ~

( 23-MAY-2014  FRI )

今朝起身   里奧大人話發咗好多夢喎   話夢見二十年前嘅我喎   係二十年前身型嘅我喎   仲係短頭髮   懶感慨咁講咗幾次夢見二十年前嘅我   我咪話囉   二十年前都未識啦   所以夢真係唔真實囉   呵呵   我識佢嗰時好 Fit 㗎   又每星期打一次網球   依家就唔好講啦   我同佢講   我想佢有安全感   我先咁肥之嘛   同埋人哋話肥先有福相   旺夫就一般   咁其實都算係妳好我好大家好   係咪先 ~

之後我又話我臨醒之前都發夢見到佢   佢勁衰勁核突呀   將啲鼻屎 "High" 哂落我前手臂度呀   搞到隻手臂立黐黐   之後我都唔弱   即刻撩番啲鼻屎 "High" 落佢塊臉度呀   哈哈   真係好核突呀 ~

今日早餐食米粉餐   其實唔餓   但 Lunch Time 要去整嘢   可能食唔切 Lunch   所以咪食飽啲 ~

菇場唔忙   但老闆佢哋成日喺隔離房開會   阻住哂上網 ~

Lunch Time 去旅行社搞嘢   1 點 35 分先搞掂   所以要打的番菇場啦   咁順便買埋咖哩魚蛋同燒賣番菇場食 ~

今晚同媽咪家姐去稻香食飯   不過我要拎嘢番屋企先   之後媽咪打嚟話血壓高   又 220 度   所以唔嚟食   咁我都去媽咪屋企睇下佢啦 ~

之後即打比家姐   家姐話媽咪又撞親隻腳   但無同我講喎   可能驚我鬧啩 ~   

我一見到媽咪   咁我問佢幾時整到啦   佢話頭先出門口   咁我以為佢 5 點出門口啦   原來係 2 點幾想出去做運動嘅時候整到   咁我話嗰時應該即刻去醫院啦   佢話物理治療師話喺屋企整到嘅時候就即刻敷冰   敷廿分鐘   咁我話佢有無話敷幾耐都仲唔退就要入院呀 ?!   佢話無講   咁我咪話妳就要即刻入院啦   之前兩次因為遲咗入院   所以抽唔到啲瘀血出嚟而要做植皮手術   妳咁都唔即時入院 !?!   之後佢仲好有道理話醫生識啲咩   物理治療話呢個方法最好   其實我已經好頭痛   今日又樸去旅行社搞嘢又好攰   所以我無力發火   我話是但妳啦   隻腳係妳   妳自己話事啦下 ~

之後又話咩黑色星期五   黑仔喎   我話妳係西人咩 ?!   之後同番家姐講   家姐話今日又唔係 13 號   黑咩鬼星期五喎   哈哈   又係喎 ~

我抖陣之後問佢點解會整到   佢話工人無啦啦將輪椅塊板整開咗   咁所以佢就撞咗埋佢喇   之後佢話日日都咁行出去坐輪椅   唔知點解今日會咁   咁我話已經發生咗   大家都有責任   工人唔小心係唔啱   但妳自己都有責任去睇   唔好成日旨意人哋   妳自己都會做錯嘢嘅   之後佢又想比說話工人聽   我話得喇   妳唔好講嘢喇   唔係又激氣到血壓高㗎喇 ~       

咁佢要再量血壓   成日話量唔度   血壓好高定啦    但其實我見到佢將血壓計包得好鬆   吊吊 Fing 咁   咁實量唔到啦   但佢話係咁㗎喎   咁是但啦   我無咁好氣話佢 ~

家姐差唔多 7 點番到嚟   佢都話就算血壓低咗都要入院睇隻腳啦   所以我同家姐快快趣落去食嘢   再買碗米粉比工人   之後番上屋企就按平安鐘喇 ~

按完平安鐘   救護員都好快到 lu   一量血壓只係 176 度   其實都算高嘅   但我有理由相信佢頭先量 220 係因為全日都激氣   同埋量得唔準囉 ~   

佢哋 8 點半就出發   家姐跟車   我就同工人打的去醫院   咁我問佢究竟發生咩事   但唔可以講大話   佢都係信主   所以佢話唔敢講大話   不過我真係覺得佢真係好純   有好多嘢佢都同我講   但其實佢係唔需要話我知嘅   哈哈   咁好啦  我問佢點解會咁唔小心   佢話佢不嬲都將輪椅放喺門口後少少嘅位置   咁媽咪一出嚟就可以坐   咁媽咪無啦啦叫佢擺前啲   咁佢當然要擺番前啲啦   唔係媽咪又鬧鬼佢  之後媽咪出門口時講聲 "哎呀"   之後摔隻腳   佢仲以為媽咪頭暈   諗住扶佢添   不過原來係撞親隻腳   咁即係工人次次擺嘅位於係最好   妳自己無啦啦又要擺前啲先搞到咁   衰啲講真係自己攞嚟 ~

再同佢傾多陣就去醫院喇   今次都係分流啦   家姐話姑娘話依家睇妳隻腳仲緊要過血壓高呀 ~

咁又等等等啦   又照 X-Ray 咁啦   因為驚佢跌親   等到 10 點再見醫生   之後家姐 Whatsapp 話我知等拎藥就走得   無耐又打嚟話唔走得   因為醫生話媽咪做過 2 次植皮手術   驚啲血管定咩唔同咗   所以都係留院觀察穩陣啲   同埋原來佢要每日搽藥膏   之後再去醫院睇下隻腳嘅瘀有無退到   咁樣都好煩   所以醫生話留院一兩日睇下點會好啲   咁又係嘅   咁果時已經 10 點 15 分   最快起碼 11 點先搞掂   咁我唔等喇   因為好鬼頭痛呀   所以我自己打的番屋企先 ~

同番里奧大人講媽咪撞親隻腳   佢第一句已經話點解唔即時入院   已經做過 2 次植皮手術仲唔知驚 ?!   我話你認為我仲可以講啲咩   佢自己第一時間都唔入院   我真係無氣再講啦   所以里奧大人話發生咗件事係意外   但去到咁嚴重嘅係人為囉 ~

之後即沖涼喇   個肚扯住扯住唔舒服又頭痛   原來真係每月一到   咁睇多陣電視都瞓 lu   聽日仲要番工 ~  

( 24-MAY-2014  SAT )

8 點 10 分起身   估唔到個肚唔痛喎   好感恩   之後里奧大人話陪我食早餐喎   咁是但啦   其實食埋早餐一定遲到㗎   不過見里奧大人係都話陪   所以食埋先囉   之後打的番菇場 ~

   
菇場唔忙   個肚仍然 OK   不過個人就好攰 ~

放工再去一田入貨   買多 16 個王林蘋果比媽咪家姐   再買多 8 包 80cal 餅比媽咪   再買啲零食   又一大袋   幾驚辛苦先拎到番屋企呀 ~

勁熱呀   番到屋企即沖涼   之後叫外賣 Tea   好耐無試過叫外賣 Tea 喇   不過無計啦   我唔想出去呀 ~

今晚里奧大人家姐請食入伙飯   所以我 4 點左右瞓下先    瞓到 6 點醒咗   但個肚好似想嚟料   所以我唔去喇   繼續瞓   里奧大人自己去食飯啦 ~

我都唔探媽咪添喇   聽家姐講媽咪隻腳都退咗啲腫   感恩呢 ~

痛就唔係好痛   但扯住   但伸一伸直隻腳又無咁痛   不過又係嘔囉   咁其實我都預咗今次會唔舒服   因為呢個月真係頻頻樸樸   都無休息 ~

里奧大人 10 點幾番到嚟   望一望佢   我又瞓番 lu ~
   
( 25-MAY-2014  SUN )

瞓到 2 點   其實雖然仲痛   但都 OK 㗎   起碼會有想起身嘅感覺   不過仍然都無胃口呀 ~

里奧大人 5 點幾出發去大家樂買蒸飯比媽咪   佢代我探媽咪啦   我真係去唔到囉 ~

家姐 7 點到咗   咁佢之後幫媽咪抹身   整下依樣整下嗰樣   咁里奧大人話走先 lu ~  

之前團購咗 Subway 嘅 Coupon   所以叫里奧大人睇完鞋之後就去 Subway 買包   唔係一陣又過哂期 ~

今晚都有啲眼瞓   所以我 10 點半就自己瞓先喇 ~