壽司 (外賣) ( 28-MAY-2014 )

( 28-MAY-2014  WED )

尋晚無啦啦發燒   最慘成身滾熱辣   完全瞓唔到   但個人又好鬼攰喎 ~

典嚟典去幾辛苦   又熱喎   里奧大人又係咁摸我有無發燒   好喇   我終於瞓到喇   仲知道已經出咗一身汗添   咁啱里奧大人又摸我   我發脾氣嗌咗一下   之後推開佢隻手   佢比我嚇一嚇呀   之後聽到佢把聲好似好慘咁講   想摸下妳有無發燒 ~

今朝 8 點 15 分起身   諗住打的番工   因為真係好攰   平時睇開嘅醫生下午休息   我諗住 Lunch Time 即飛去睇   不過之後望下鐘   原來都已經 8 點 50 分   咁番到菇場都係遲到㗎喇   所以打番去菇場話睇完醫生先番呢 ~

落到去診所啱啱開門   不過已經有幾個排隊 lu   姑娘仲問我做咩咁早   嘻嘻 ~    

差唔多 9 點 45 分先睇   醫生第一句就話做咩面青青   其實佢次次見到我都會話我面青青   咁唔舒服個樣係衰啲㗎啦   哈哈 ~

仲係 38 度   不過我話星期六去旅行   所以一定要好番囉   同埋我一陣仲要番工   咁醫生話開輕啲藥   等我唔好咁眼瞓囉   但要食抗生素 ~

食埋早餐先打的番菇場   今日熱到黐線呀   勁辛苦 ~

番到菇場即食藥啦   估唔到啲藥好快嚟料   成個人呆呆滯滯 ~   

Lunch Time 出去買車仔麵番菇場食   不過食剩一大半   但真係食唔落 ~

呆到放工   之後去買嘢    再買埋壽司就番屋企喇 ~

番到屋企已經 6 點半   所以即刻開機洗衫   之後沖涼   抖陣就開餐喇   勁餓呢 ~

里奧大人喺上水食埋嘢   9 點幾就已經番到屋企   算早㗎喇 ~

之前買咗啲王林蘋果   一定要喺去旅行之前食哂   咁我洗咗比里奧大人啦   佢又話要切皮   咁我叫佢自己切囉   我真係好攰嘛   佢一路食一路話個蘋果好甜好多汁   我話你今日係第 3 個人講啦   家姐 Lunch 食蘋果又咁講   我請 PMS 食半個   佢又咁講   其實我都驚自己買得唔好㗎   不過見咁平   真係好難忍手囉 ~

里奧大人話尋晚成日摸我有無發燒   所以無咩點瞓   今晚 10 點半佢就入房瞓喇   我就差唔多 11 點先瞓呢 ~