黑椒炒豬柳 + 蒜蓉蒸脆肉瓜 + 松子仁炒飯 ( 16-MAY-2014 )

( 16-MAY-2014  FRI )

里奧大人今朝無啦啦又上大陸   所以 7 點起咗身   咁我都瞓到 7 點 40 分先醒 lu   最多一陣沖涼洗頭加快速度呢 ~

我啲朋友都知里奧大人成日都要上大陸   問我驚唔驚   我真係唔驚喎   佢根本唔係搞搞震嗰啲人   佢唔會為咗另一個女人唔理我嘅   佢只會為咗佢個麻煩法國客唔理我啫   呢個就係我最大嘅敵人   哈哈 ~               

依家時勢所趨   好多時都要上大陸做嘢㗎喇   佢做間間公司都要佢上大陸嘅   有間仲要過嘢添   無計啦   喺韶關呀   來回要 6 粒鐘   如果唔過夜   就咩都唔駛做   就算佢長駐大陸   我都唔驚佢有女人囉   只係驚佢夜晚唔知食咩咋   好感恩佢身邊啲同事都係顧家嘅人   放工又係趕住番屋企果隻呢   咁講真   如果佢要變心都無辦法   咁當然首先要檢討一下自己先啦   一隻手掌拍唔響家嘛   係咪先 ~   

佢有個男同事好搞笑   話說有次里奧大人幫手拎 Cream 比大陸同事   咁佢無咩所謂家嘛   佢個男同事話差啲搞到家變呀   佢老婆見到佢袋有支 Cream   以為佢大陸有女人呀   佢老婆對自己太無信心喇  哈哈   我間唔中都會開里奧大人個背囊睇睇㗎   睇佢夠唔夠紙巾   唔夠就比幾包佢   因為佢鼻敏感   成日要用紙巾嘛   我知佢鼻侯感嚴重嗰幾日   我會擺 6 包紙巾喺佢胄囊   佢一見到話好誇張呀   哈哈   咁紙巾輕嘛   無咩所謂啦   嘻嘻 ~

今朝唔想見到渠王   所以去另一間食早餐   不過應該唔會再去呢間   因為啲嘢唔好食   杯咖啡又唔好飲囉 ~

菇場唔太忙   發達喇 ~

Lunch 食 Flakes + 朱古力奶   其實都幾飽肚 ~

放工即走 lu   今晚唔駛買餸   因為前晚已經買咗   仲醃埋添   所以今晚番到屋企抖陣   再開機洗衫就可以煮飯 lu   不嬲里奧大人上大陸   我會番媽咪屋企食   但因為之前買咗餸嘛   所以我講明佢今晚一定要番嚟食飯囉 ~

是日晚餐 - 黑椒炒豬柳 + 蒜蒸脆肉瓜 + 松子仁炒飯

黑椒炒豬柳 - 用韓式醃肉醬醃咗兩晚   勁入味啦   哈哈   加埋乾蔥頭同黑椒醬一齊炒   好好味呀 ~  

蒜蓉蒸脆肉瓜 - 懶呀   所以就咁蒸就算喇 ~   

松子仁炒飯 - 喺馬來西亞買嘅炒飯醬料   原來已經過咗期一個星期   咁我又聞到無臭   所以用埋佢啦   今次得 2 碗冷飯   所以食起上嚟好鹹呀 ~

其實我唔知呢隻係咩味道嘅醬   只知道係用嚟炒飯呢   

搞掂哂就沖涼   感恩里奧大人可以 8 點幾番到屋企   因為平時佢 8 點幾仲喺大陸未放工呢 ~     

我發覺如果我將飯同餸裝埋一碟   佢多數食得哂㗎喎   同埋我知道今餐真係好多飯餸   佢自己逐樣夾   佢會剩番好多   可能懶得夾啦   所以我整靚啲啲   等佢食慾大增啲啲   佢都話擺得好睇㗎   不過就 Too Much 咗啲   哈哈 

 之後睇電視   11 點半自己瞓先   比啲私人時間比里奧大人   哈哈 ~