叙苑粉麵茶餐廳 @ 九龍灣 ( 9-MAY-2014 )

豉椒牛肉炒麵 - 勁好味呀   下次要獨享

潮州粉果 - 自從上次話好食之後   之後再叫每一次都係唔好食嘅

( 9-MAY-2014  FRI )

感恩尋晚都瞓得唔錯呀   都 OK 精神啦 ~

睇黎今日又會落長命雨㗎喇   所以帶直身遮   因為真係好唔鍾意收縮骨遮嘅時候   整到隻手濕哂呢 ~

今朝想靜靜哋   所以去另一間食早餐喇 ~

菇場忙啦   最煩就係做 Report   又要打又要對   不過我諗住慢慢做   因為對眼真係好鬼攰嘛   點知同事打黎比我問我有無收到個 Report   我話做緊   之後我 Check 下個 Email   原來尋日已經要交㗎喇   哈哈   我無睇日子添   所以之後開行 Turbo 做啦   其實已經入好哂所有嘢   只係 Double Check   所以都好快搞掂呢 ~

11 點幾家姐打嚟話媽咪又入院   話頭暈又嘔又氣速   Fat Fat 叫我請假陪佢入院   我話唔得啦  阿頭同大粒都唔喺度   無人可以話得事   同埋我去得媽咪屋企   媽咪都入咗醫院啦   我話最緊要係媽咪入咗醫院   有醫生跟進   我喺度根本無咩做到 ~

今朝買咗麵包   所以 Lunch 就食包喇   諗住食 2 個飽啲   不過食完個酥皮叉燒包都好飽   所以 4 點先食埋個菠蘿包  ~

家姐打嚟話媽咪話要食粥   所以叫家姐工人買粥比佢   我就話奇怪啦   又話好唔舒服但又想食粥   叫工人去 canteen 買通粉咪算囉   駛唔駛特登叫家姐工人買喎   咁如果家姐無工人咁點呢下   講真   我有啲激氣㗎   因為真係唔需要咁囉 ~

今晚自己食   但勁想飲粟米湯   諗住去百住買   點知無貨   咁去惠康買啦   得番 Last One   我都照買   因為勁想飲呀 ~

番到屋企打比家姐   原來佢去緊探媽咪   因為媽咪仲喺觀察病房   所以我無諗過佢探媽咪囉 ~

咁我話陪佢啦   佢又話唔駛   之後佢去到醫院   佢話媽咪就無咩嘢   但抖氣辛苦   同埋話照到個肺有啲感染   之後佢話媽咪話好辛苦喎   就嚟死   要見阿妹   咁我就打的去啦   反正我根本諗住去嘅 ~

7 點半入到病房   工人好搞笑   即刻拉媽咪隻手出嚟捉住我   話細女喺度   之後又拉埋家姐隻手比媽咪捉住   話大女喺度   好似做戲咁   咁媽咪雖然話好凍   但隻手其實仲暖過我囉   咁我都安心啲   不過我都知佢辛苦   因為我都試過胃酸倒流抖唔到氣   嗰次我直頭連行都辛苦呀   但最勁係我捱到放工叫里奧大人陪我去睇急症 ~

差唔多 7 點 45 分   醫生話要上房   咁仲好   唔駛喺觀察病房等 ~

咁上到病房已經 8 點 15 分   幫埋媽咪換衫   諗住等埋醫生   不過唔知佢幾時嚟   所以又繼續等   之後媽咪係咁話好辛苦   好想死   叫醫生唔好醫佢   又特登整甩個血壓計   但家姐就細細聲同我講囉   話辛苦又會可以彈幾次身坐直嚟抖下氣   因為如果真係好辛苦   妳根本係無力   呢個係事實 ~   

里奧大人 9 點打嚟話放工   不過喺大陸番嚟都起碼 10 點幾   咁叫佢陪我食晚飯呢 ~

9 點半醫生又未到   我哋又攰又餓又凍   出面又落大雨   我哋諗住走㗎喇   點知媽咪又話想我哋留低   又話叫醫生幫佢打支針等佢死   好辛苦喎   咁好啦   等多陣囉   但我同家姐講囉   一話走就依樣嗰樣   我知佢辛苦   但我最憎係佢講埋呢啲嘢囉   好煩   不過我當然唔會話佢啦   唔理佢算數   差唔多 10 點   姑娘話醫生唔知幾時嚟   叫我哋走喇   咁媽咪都聽到㗎   係姑娘要我哋走   想留低都唔得   同埋仲有其實病人要休息家嘛 ~

咁鬼夜又落大雨   真係好感恩有的士咋   我同工人一架的士番屋企   家姐就另一架的士番屋企   如果唔係佢 11 點都番唔到去呀   同埋又仲未食飯呢 ~  

里奧大人去叙苑等我   勁餓呀   真係咩都唔講住   要食嘢先   之後講番媽咪話唔舒服單嘢佢聽   佢話如果真係辛苦係唔會講呢啲   同埋佢知道媽咪好驚青   仲更加唔會講呢啲添   哈哈 ~

番到屋企即沖涼   抖陣就瞓喇   勁攰 ~