燒汁鯖魚 + 茄汁煎虎蝦 + 臘腸 + 西蘭花 ( 14-JAN-2015 )

( 14-JAN-2015  WED )

成日以為今日係星期五   因為里奧大人多數星期四上大陸嘛   搞到我都亂哂   哈哈 ~

好想快啲星期六   咁樣可以食麵餐   呢間餐廳大部份人都係食麵餐之類嘅嘢   好少人食三文治或者多士   最多 2-3 個   次次聞到啲出前一丁味道就好想食   啲人又食得好滋味咁喎   引到我呢 ~

今朝試下焗菊花茶飲   因為對眼濛查查好辛苦囉   啲杭菊係上次去廣州唔知咩神秘果園入面買㗎   沖咗 20 粒左右   但覺得無咩味   飲多兩日   睇下會唔會對眼無咁濛查查先 ~        

菇場忙啦   啲嘢煩到嘔   所以要好專心做呀做   做呀做 ~

Lunch 出去食喇   因為唔開心呀   激到我想喊   所以唔想留喺菇場 ~

番到菇場都差唔多 1 點半 lu   抖陣又要開工   5 點終於搞掂哂   可以抖下 ~

放工去 Taste 買車厘子   之後行多個圈就番屋企喇   諗住一路聽歌一路預備晚餐   點知大食表妹打嚟傾偈   同佢傾咗 45 分鐘   佢又唔知用咩鬼台   成日斷線   斷完打蹳   打蹳無耐又斷線   足足 4 次呀   真係好煩   之後同佢傾婆婆啲嘢嘛   又成日唔知個核心問題係邊   人講佢又聽   都唔分析嘅   好在同佢講咗咁咁咁   講真   話哂我哋局外人   唔係親眼見親耳聽   真係唔可以 Involve 落去件事到囉 ~

傾完都 7 點幾喇   要煮飯喇   今晚自己食先 ~

是日晚餐 - 燒汁鯖魚 + 茄汁煎虎蝦 + 臘腸 + 西蘭花 

燒汁鯖魚 - 本來諗住用光波爐焗   不過焗完又要洗個玻璃兜   所以最後都係煎喇   想一隻鑊搞掂   哈哈 ~  

茄汁煎虎蝦 - 里奧大人話啲汁好味   問我點整 ?!   我話求其咋   因為係誤打誤撞整出嚟嘅   估唔到又好味囉   勁開心 ~        

臘腸 - 蝦肉比哂里奧大人做餸   食半條魚又唔夠餸咁   咁我聽日又帶飯   所以就蒸孖臘腸做餸喇   冬天食臘腸就好味   夏天食會飽飽滯滯   所以襯依家咁凍要食多啲先 ~

西蘭花 - $10 有 3 棵呀   好抵囉   所以唔買唔得   其實 3 個煮落都好多   但唔想再留囉   唔係一陣無時間食   之後壞咗仲嘥 ~ 

我間唔中都會問家姐夜晚食啲咩 ?!   咁今晚我就影咗張全家福比定姐睇   佢話已經好餓   仲比啲嘢食佢睇   搞到佢勁餓   因為佢有嘢搞仲未番屋企食飯   我話邪啦   好日唔影全家福   影咗嗰晚反而佢仲未喺屋企食飯   平時佢同我差唔多時間食飯家嘛   哈哈 ~   

里奧大人 8 點放工   咁陪佢食飯又傾下偈   等佢食完都 9 點半   我要出去徑步喇   番到屋企先再洗碗呢 ~  

我徑咗半個鐘   番到屋企大堂管理員話咁快   我話徑半個鐘啦   佢話有無呀   可能佢覺得跑步起碼要半個鐘先叫跑步呀   哈哈 ~

洗完碗就沖涼   睇多陣電視   11 點幾瞓喇 ~