鮮菜豬肉水餃拉麵 + 皇帝菜 + 馬蹄糕 ( 21-JAN-2015 )

( 21-JAN-2015  WED )

尋晚飲咗百香果綠茶   點知成晚攣嚟攣去都瞓唔着   但又唔想出廳   因為好凍   所以今朝勁攰啦 ~

今朝好想食麵餐   但火腿牛油包就真係食唔落   留番做 Lunch ~

菇場唔太忙   不過個人都不在狀態   菇場個 Board 寫阿齋 20/1 係 A/L   咁我同 8 卦講話個 Board 寫錯嘢喎   阿齋今日咪番咗囉   之後 8 卦話今日係 21 號啦   搞咩呀   哈哈 ~

Lunch 食麥皮 + 早餐剩嘅火腿包   都 OK 飽   可能我食 2/3 杯麥皮   又唔杰   所以一陣都可能會餓   好在菇場有餅乾 ~

放工走喇   去 Taste 買餸   本來想買 Bibigo 手工水餃   不過一包要 $51.9   我覺得勁貴喎   聽日再去百佳睇下先   所以買咗包鮮菜豬肉水餃算喇 ~

約咗整燈師傅 7 點   所以番到屋企即浸菜同埋開機洗衫   師傅 7 點準時到   整完都差唔多 7 點半   之後我即刻蒸糕喇   再煮埋嘢   因為今晚我自己食先喇 ~

是日懶餐 - 鮮菜豬肉水餃拉麵 + 皇帝菜 + 馬蹄糕  

鮮菜豬肉水餃拉麵 - 水餃細細粒   拉麵又細細包   所以加埋菜就啱啱夠飽喇 ~   

皇帝菜 - 細細扎又乾淨   所以買嚟食喇 ~

馬蹄糕 - 想清咗盒馬蹄粉   所以就整馬蹄糕喇   原來咁易整   不過我覺得最麻煩係批馬蹄皮   我又無耐性   所以都批咗唔小肉出嚟   諗住用焗盤蒸啦   長方型靚啲嘛   不過個鑊唔夠深   蓋唔實個蓋   所以即換過不锈鋼碗   好在 Size 啱咋   唔係就煩喇 ~

食完抖陣都 8 點半   見里奧大人都未放工   咁我都出去徑步喇   點知落樓無耐就打嚟話放工   咁我唯有加快腳步跑啦   20 分鐘急步徑咗 6 個大圈   之後要番屋企煮麵比里奧大人食喇 ~

搞掂哂就即沖涼   今晚有啲攰   所以 11 點就瞓 lu ~