XO 醬爆西芹花枝片
蓮藕湯
雪耳糖水 - 原來食小菜送嘅 上次都無嘅 咁里奧大人話驚甜 所以唔食 阿姐係都叫佢食啦 之後阿姐仲比杯熱水我哋 話如果甜就加啲水 阿姐勁好人呀
( 18-JAN-2015 SUN )
今朝要番主日學同做司事 所以 8 點半都起身 lu 沖埋涼就落去食早餐 之後番屋企抖陣就番主日學 lu ~
邊有咁多肉碎 3 碗加埋都無咁多
我知道圖片只供參考 但都唔好咁過份囉
番到 11 點 10 分就要走喇 因為做司事要 11 點 15 分到會堂 其實受浸之後都做過司事 不過之後無做 依家做番呢 感覺又唔同一樣 好緊張 因為人數比之前多一倍有多 計錯人數就煩喇 ~
崇拜完畢就番屋企拎番部電腦去高登整 因為個 8 字 Key 有時打到有時打唔到 所以拎去換 不過唔知換唔換到囉 不過反正我要去買紅米 Note 所以就拎埋去囉 ~
去到試機 一開機無啦啦要 Update 等咗 10 分鐘仲 Update 緊 所以出去行下 咁啱見到紅米 Note 舖頭 咁買埋先再上去 lu 之後再 Check 個 8 字又打到喎 咁無得換 lu ~
搞掂哂都 3 點 咁我話想食海南雞飯 好感恩有卡位 我哋 2 點 58 分叫完 但原來 3 點係下午茶 蝕哂喇 哈哈 ~
泰式海南雞飯
喇沙魚蛋雞絲金邊粉 - 估唔到真係辣辣哋 因為 Menu 有隻紅辣椒 但無諗過會咁辣
食完就去鴨寮街 Trade 電話同買電話套 之後就搭地鐵番屋企 lu ~
番到屋企再試部電腦 又試打 8 字 好在今次打到 里奧大人話頭先個店員好大力打個 8 字 可能打鬆咗 哈哈 點都好啦 最緊要打到啫 ~
其實好眼瞓 但又唔想瞓 所以熨 2 機衫 熨完都 6 點半 出去食飯 lu ~
入到餐廳好焗 咁問里奧大人 O 唔 OK ?! 佢話 OK 就坐得啦 坐落又無咁焗咁 但之後又開始焗喎 同埋里奧大人係咁 "包雲吞" 驚佢焗親 不過佢話今朝崇拜隔離個阿伯係咁咳同打噴嚏 雖然有戴咗口罩 但我話我都唔會坐佢隔離囉 因為我今日做司事無同里奧大人坐嘛 咁我都問佢點解坐喺戴口罩嘅人隔離㗎 ?! 我真係會盡量唔坐囉 佢話本身坐佢隔離嗰個係後生仔 咁崇拜差唔多開始 個後生仔叫咗阿伯坐佢個位 個後生仔就走咗 哈哈 咁無法啦 走都走唔到咯 ~
行番山路番屋企 不過我好飽 所以叫里奧大人番屋企先 我就行 3 個圈先番屋企喇 ~
沖埋涼都係 8 點幾 實在太好喇 好似好多時間用咁 ~
食埋生果就抖喇 里奧大人真係似唔舒服咁呀 係咁包雲吞 包咗 2 卷廁紙呀 所以佢 10 點幾就瞓喇 我就 11 點幾先瞓 ~
沒有留言:
發佈留言