海港酒家 @ 將軍澳 ( 31-JAN-2015 ) (禁)

紅炆龍躉斑翅 - 材料仲有腐竹同燒肉   都幾濃味   所以真係最好送飯

紅炆龍躉斑翅 - 都啖啖肉好味道   我同家姐講話   如果得我同里奧大人兩個食   我都會叫   因為我鍾意食魚

瑤柱金菇扒豆苗 - 好味道呀   同埋份量好多   好似 $78   我覺得勁抵

例牌乳豬 - 乳豬呀乳豬   我勁想食囉   所以叫佢哋快啲食哂去   哈哈

別不同果醋骨煲 - 今次整得好衰啦   個汁太稀喇   同我之前食都唔同   家姐都話係唔同咗呀  

楊洲炒飯 - 粒粒分明好味呀

千層咖啡糕 - 好濃咖啡味   不過唔煙韌呢   如果唔係就更好      

雙皮奶燉燕窩 - 媽咪自己食咋   

朝日啤酒 (大) $22 又抵喎

( 31-JAN-2015  SAT )

今朝約咗 8 卦食早餐   咁我背住餐廳門口嘛   不過我都會間唔中轉頭望下去   佢話 8 點 45 分左右到   咁又望下啦   見佢坐咗近門口   仲想叫嘢食添   之後我即刻過去啦   條友真係呢   如果唔係我望到佢   我同佢就變咗各有各食喇 ~

芝士吞拿魚治   塊多士唔熱嘅   所以食到最尾啲芝士都唔溶

8 卦嘅沙爹牛肉公仔麵   勁香呀

又忙啦   忙到放工 ~

今日要去拎回鄉卡   不過就授權咗比里奧大人幫我拎   咁樣唔駛我行來行去   但我咁啱放工就有巴士   所以我落車嘅時侯   里奧大人就啱啱拎完   咁我等埋佢先一齊去 Mega Box 呢 ~

想 Hea 呀   所以去飲茶   唔食紅肉真係好少選擇咁   哈哈 ~

我好鍾意食呢度嘅木耳   雖然係麻辣   但味道又 OK 喎   因為我自己唔會整木耳呢

家鄉煎薄罉 - 今次我話要食呀   

沙律明蝦角

南瓜豆沙煎軟餅



四寶滑雞扎

蛋黃千層糕 - 食奶皇包咁

食完就去大眾買 "人性的弱點"   之前咁啱同 8 卦傾開啲心理輔導問題   佢話呢本書好睇   咁我再問里奧大人   原來佢一早已經睇咗英文版本   之後再買多本中文版本睇   不過本書喺大姑奶屋企   所以佢叫我再買好過   佢朋友鬼仔先勁   記得作者名添   佢超鍾意睇書   頭先 Whatsapp 比我哋睇   佢一口氣買 3 本書同 2 份報紙   里奧大人仲以為佢喺書檔影添呀   哈哈 ~

$40 仲有 9 折   又好抵喎

買埋過灑器濾器就走喇   點知見到 Isabella 有得抽獎   咁我又抽啦   叫埋里奧大人一齊抽呀   我地都中獎 (我估其實個個一抽都中   只不過係細獎定中獎囉)   所以又要上番 7 樓換禮品   哈哈 ~

左邊係里奧大人抽嘅細獎 / 右邊係我抽嘅中獎 - 里奧大人一見到就話呢個女仔係我鍾意啲款   咁我比家姐睇啦   佢第一句又係話呢個女仔係我鍾意嗰啲   我好開心佢哋會記得我啲嘢   哈哈

細獎嘅係細塊啲   中獎係大塊啲   我分哂比媽咪同家姐   自己留番 1 大 1 細綠茶比里奧大人食   分完之後先知道原來我無得食   哈哈

隻腳有啲痛   所以都係搭 Shuttl Bus 番九龍灣   順便去旅行社 ~

搞掂哂就去媽咪屋企   今日飲茶打比家姐   先知媽咪上個月原來唔小心將支洗頭水跌落隻腳度   所以里奧大人話去媽咪屋企睇下咩情況囉   依家對腳指仲有少少痛同少少瘀黑   我咪話媽咪囉   一早講我哋知嘛   隻腳啲瘀唔去就會壞死㗎   唔好睇少範圍多定少   佢講極唔聽真係好鬼煩   所以我話都廢鬼事理妳   成日就無事變有事先嚟睇醫生   到時咩都遲啦   反正唔係我痛   妳鍾意點就點 ~

家姐 5 點半左右就嚟接我哋去海港   今晚食團年飯呀   估唔到姐夫又得閒   所以一齊去呢   勁開心 ~

無得 Book 位   所以 6 點先去到   好在有位咋   因為坐低無耐已經 Full 哂 lu   個個都應該係提早食團年飯㗎喇 ~ 

差唔多食哂   家姐就去奇華買蛋卷   咁 8 點幾有侍應叫我哋埋單   最搞笑姐夫話比錢嗰個行開咗   張單擺低先   等佢番嚟比錢 (之後家姐講番   話次次出街   佢多數係要簽卡   所以姐夫都會一出街比錢   就叫家姐簽卡)   咁我同里奧大人都喺度家嘛   咁梗係里奧大人比啦   姐夫係都話唔好   我話有咩唔好喎   請屋企人食飯有咩所謂   之後家姐番到嚟   我哋話走得㗎喇   家姐又碌大對眼話 "下   乜埋咗單喇 ?!"   之後又係都比番 $500 我哋   我哋唔會要囉   屋企人唔係咁計家嘛   唔係一定做大嘅比錢呢   同埋家姐又成日買嘢比我哋食   妳請下我   我請下妳就最開心呢 ~

之後分頭行事   因為我要去廣良興買糖   好在後尾家姐見到我   因為我唔識點去停車場呀 ~

去埋媽咪屋企拎生果就番屋企喇   我即沖涼喇   里奧大人就去徑步 ~

$4.8/100g   呢度買咗 $31

我 Whatsapp 比家姐叫佢估幾錢   佢估 $28   我打勁   之後打錯   哈哈   佢話當時佢見到勁字   已經打緊 "係咪真㗎 ?"   之後佢見到錯字   咁嗰句唔駛打   之後佢再估 $33   我話差唔多   佢再打 $35   我打錯哂啦   再少啲   佢打 $ 32   咁我比答案佢   係 $31 先啱   之後佢忍唔住打嚟   話 $31 但點解 $28 係勁錯   但 $33 就差唔多呢 ?!  大家都係相差 $2 同 $3之嘛   我話是但啦   我最主要目的係想打妳答得勁錯啫   哈哈

1 磅蜜汁豬肉乾 ($60) / 1 磅豬肉鬆 ($30)

媽咪買比我哋嘅生果   其實之前嗰啲都仲未食完   明明話要 1 個柑   點知又 4 個   明明話得 1 梳皇帝蕉   又有 2 梳   其實真係唔可以買咁多比我囉   我哋又唔係成日食生果   有時擺到爛咗就掉   好嘥

唔知係咪飲咗幾啖熱茶   11 點幾瞓都唔太眼瞓   所以里奧大人瞓先   我 12 點幾先瞓到呀 ~