元氣壽司 @ 九龍灣 ( 20-JUN-2016 )

今晚用手機 Manual 影相   唔係里奧大人又嘈我試用手機影相㗎喇
三文魚湯 - 好味道呀   飲完成身暖哂   最緊要依家唔係三文魚頭湯呢    

海鹽赤海蝦 x 2 - 影到黑沉沉   但無心機校呀   因為當時好餓

飛魚籽軍艦

中華沙律  

元氣卷 / 炸蝦天婦羅 / 三文魚壽司 - 我覺得隻碟同擺位都係板長靚啲   唔會黐埋一堆咁    

其實我都鍾意食元氣卷   因為有青瓜同沙律醬   但就唔係咁鍾意食軟殼蟹

芥辣八爪魚軍艦

北寄貝沙律軍艦   唔好食嘅   諗住啲沙律凍凍哋嘛   點知係暖暖哋   好怪咁

( 20-JUN-2016  MON )

尋晚瞓到半夜熱醒   直頭成頸都係汗   要用紙巾抹汗   最驚立黐黐咁瞓呢 ~

一起身就問里奧大人尋晚佢熱唔熱   佢話唔熱   我話熱到成頸汗呀   佢話可能尋日我食咗芝麻糊   又車厘子同飲杞子龍眼   所以燥熱喎 ~

今朝洗埋頭添呀   吹頭吹到熱辣辣   加上條街又焗熱   辛苦到呢 ~

早餐食熱狗   想食酸酸咪咪嘢呀   如果可以有半份熱狗就好啦   咁唔駛食剩啲麵包   其實唔想嘥架   但真係食唔落 ~

菇場忙咗陣   之後就拿拿聲搵旅遊資料   唔想再拖喇 ~

Lunch Time 唔餓   但又想食完先行   所以出去食   之後再行半個鐘   我唔係行商場㗎   所以熱鬼到呢   真係行到成身汗 ~

菇場仍然 Hea 過   可以繼續搵資料   呵呵 ~

放工即走   坐小巴出旺角銀城中心同里奧大人拎番部 G4   感恩等多 1 個號碼就到我   6 點半左右搞掂   一場嚟到又唔想咁快走   所以去咗優品 360 買咗罐 Blue Diamond 蜜糖果仁   做緊特價只係 $28 咋   之前行幾次百佳都已經想買   但一罐要 $4x 就實在太貴   唔捨得買囉 ~

坐番小巴番九龍灣   咁順便番屋企幫里奧大人拎張大陸電話卡   之後再 Join 佢喺衛訊等呢 ~

好餓呀   所以去元氣   食完先買手機   但等 30 張飛   等咗成 20 分鐘都未郁   所以里奧大人話都係買咗手機先   之後再番淘大食 ~

因為大陸電話卡用唔到   所以佢唔可以買 V10   咁唯有買 G5 啦   優惠價係 $3,980   但就要比 Cash   咁比 Cash 啦   最緊要有優惠   同埋都好多嘢送㗎   有保護貼 + 32G SD Card + 後備電 Kit Pack + 毛巾 + Micro USB 頭   本來送埋手機套   但唔靚呀   所以唔要 lu ~      

同佢行去衛訊   之後我突然清醒   話你有你買   我有我等咪得囉   如果買完都仲未有位先番淘大食 ~

我又行番去元氣繼續等位   之後里奧大人打嚟話無 Cash   咁我行番去比錢佢啦   佢個樣好驚咁   問我做咩有咁多 Cash   大佬   無用到錢咪有囉   唔通頭先搶番嚟比你咩 ~      

好喇   再行到去元氣   佢又打嚟話部 G4 喺我度   我又要行番去比佢   真係麻鬼煩   本身已經熱   商場冷氣又唔夠   真係黑佢面再問佢仲有無嘢要比呀 ?!   我唔會再行第 3 次囉 ~

8 點有位   所以我入去邊等邊食咯   佢差唔多 8 點半先搞掂呀   因為得一個人 Serve 幾個客   唔怪得咁耐啦 ~

今餐又係抵   食咗 $176   但用埋 $30 賞分   只係 $146   我覺得最開心係可以用哂啲賞分   呵呵~  

食完即番屋企沖涼喇   開冷氣開風扇   之後敷 Mask   冰冰哋嘅感覺真係舒服   之後家姐打嚟傾偈   佢問我點解我講嘢咁嘅聲   我話做緊 Mask 呀  之後一傾傾咗半個鐘   唔怪得我覺得塊 Mask 乾乾哋咁啦 ~

衰里奧大人又問做咩咁多錢喺身   好喇   本來都想送部手機比佢   依家要佢全數比番哂我呀   我話我依家午餐日日食麵包咋   又無心情亂買嘢   幾咁慳呀   之後佢喺度笑   哈哈   我要學佢咁   午餐食多菜就會影相比我睇   食埋啲午餐肉腸仔呢啲就唔比我睇㗎喇   所以我食包同麥皮就影比佢睇   食酸辣米線就唔比佢睇   所以佢成日覺得我唔夠飽   哈哈 ~

里奧大人搞部手機   我就睇飲食男女   差唔多 12 點幾先瞓   但其實我唔眼瞓   唉 ~