蕃茄蝦肉蜆肉意粉 ( 21-JUN-2016 )

( 21-JUN-2016  TUE )

感恩尋晚都瞓得好   但唔知關唔關徑步事呢 ?!   等我今晚再徑下先   如果真係瞓得好就 Keep 住徑   但其實要鼓起好大勇氣㗎   因為條街真係好焗熱   好唔想出去囉   哈哈 ~

無啦啦勁想食蛋   所以食蛋治 ~

菇場忙下停下   之後又忙   唔知係咪太耐無忙   係咁行嚟行去   所以 11 點就已經好鬼肚餓   但今朝食蛋治喎 ~

Lunch Time 即衝出去喇   去萬寧買 Cream 同買麵包比里奧大人   之後買燒賣粉果番菇場食   真係好餓   覺得好味同埋居然覺得唔係好飽   哈哈 ~

仍然忙下停下   所以好快就放工 ~

今朝 11 點左右九龍灣迷你倉火燭   燒咗 6 個鐘都未救熄啲火   咁真係好大件事啦   不過迷你倉真係咩嘢都有   一燒起上嚟真係一發不可收拾   唉 ~      

咁我坐巴士嘛   巴士司機開廣播話唔入淘大   要喺彩頤居落車   我第一次咁聽到㗎咋   途經得寶見到好多消防車 救護車 新聞車   又見到啲消防員喺度休息   佢哋個樣超級勁攰呀   睇見都心痛 ~

今晚去 Taste 買豬扒   因為諗定整洋蔥豬扒   但 3 塊薄嘅都要 $27   我又覺得好貴囉   同埋里奧大人今日又食咗咖哩牛腩   唔想佢食太多紅肉   所以即轉陣去買 1 包急凍白肉蝦同 1 包蜆   咁都只係 $33   依家買嘢真係要用好多時間   咁先可以慳到啲啲   我又唔識睇唔識煮   所以好多時買貴咗又唔知   真係好羨慕啲人咩都識煮   最正係食到時令食材嘛   所以真係覺得里奧大人好慘咁   好在佢超易滿足   覺得有餐住家飯食已經好好   嘩哈哈 ~    

番到屋企即煲麥茶比里奧大人   之後就解凍蝦同蜆同雜豆   搞掂哂就拖地 ~

里奧大人差唔多 7 點放工   我要即刻煮嘢喇 ~

是日懶餐 - 蕃茄蝦肉蜆肉意粉  

蕃茄蝦肉蜆肉意粉 - 諗住食唔落   點知食得落   今日咩事呀   全日都好肚餓咁嘅 ?!   最邪係高妹又話今朝食完早餐   但 10 點半已經餓   阿 mi 又話今日好餓囉 ~

搞掂哂   8 點出去徑步   剪髮表妹話佢之前食完飯抖 15 分鐘就去散步   快行半個鐘   一個月瘦咗幾磅呀   所以我都想試下   佢話咁樣好過食完飯抖 1 個鐘之後先徑步喎   不過我都真係勁唔鍾意食完抖 1 個鐘先去徑步   嗰 1 個鐘頭唔知做咩好   煮完飯無得沖涼已經好慘   仲要喺度等等等 ~

徑咗半個鐘就番屋企喇   沖埋個涼就休息 lu ~

今晚 11 點幾開始有啲攰   所以拿拿聲瞓覺喇 ~