蠔油燜節瓜鴨掌排骨 ( 7-JUN-2016 )

( 7-JUN-2016  TUE )

尋晚瞓得唔係太好   因為媽咪工人無 Whatsapp 覆我   成晚掛住佢   唔知佢慣唔慣呢 ~

見到人食榨菜肉絲米   所以我又食喇   因為好似好好味咁 ~

菇場忙下停下   所以好快就 Lunch Time ~

唔餓就出去行下   順便去買包比里奧大人   再行到 1 點先買燒賣粉果番菇場食   今次啲豉油好鹹咁   之前係甜豉油家嘛   嗚嗚 ~

菇場仍然忙下停下   咁真係唔錯㗎   唔太辛苦又快到放工   哈哈 ~

今晚放工去 Taste 買煙肉味薯圈比里奧大人   難得佢鍾意食   不過無特價   所以買包熱浪算喇   我排隊嘅時候   有個男人拎住盒飯衝住跑埋嚟   仲企喺我隔離   雙眼望另一邊扮睇我唔到   擺明打尖啦   我一早企咗喺度㗎喇   所以我叫佢去番後面排隊   不知所謂   唔好以為我係女人   我就唔敢出聲   我心情唔好呀   如果佢鬧我   我一定會好不客氣鬧番佢   同埋事實真係佢唔啱囉   明明佢本來可以排我後面   佢又扮睇我唔到   到最後佢反而排第 5 個 ~

番到屋企即開機洗衫   之後預備晚餐喇   里奧大人 6 點 45 分放工   實在太好喇   可以快啲食飯快啲休息 ~

是日懶餐 - 蠔油燜節瓜鴨掌排骨

蠔油燜節瓜鴨掌排骨 - $5 有 3 個大節瓜   超勁抵   所以即買   之後再睇其他檔口   原來節瓜依家係 $3/斤咋   之得唔買住啦   可以揀靚啲嘛   好在呢 3 個都靚咋   又突然好想食鴨掌   所以買半磅   再買多 $15 排骨   呢個餸加埋啱啱 $30   如果我帶飯   即係 $30 兩餐   自己煮真係抵好多呢 ~   

搞掂哂就沖涼   呢期電視畫面唔係 Minions 就係狼牙捧   哈哈   不過如果里奧大人喺屋企嘅話   我一定比佢睇狼牙捧   等佢可以放鬆下   同埋我一番到屋企已經睇到 Minions 嘛   再要睇就好自私啦 ~

今晚終於收到媽咪工人 Whatsapp   我個心都放鬆哂喇   佢星期日放假仲約咗家姐   咁都好呀   我哋又可以見面   佢又唔駛特登搵地方去 ~

11 點唔夠瞓喇   其實只係有少少睡意   不過照瞓啦 ~