燻蹄 (外賣) + 粟米蛋花湯 ( 10-JUN-2016 )

里奧大人嘅大陸同事請食嘅紅豆糭   幾好味   但我食咗一啖就唔食喇   主力食粟米   叫里奧大人自己食哂去   哈哈

真係每湯匙都係咁多粟米   我咁鍾意食都食到有啲驚   哈哈      

( 10-JUN-2016  FRI )

尋日放假   又見到家姐表妹同阿 mi   所以成日以為今日係星期六   不過今日係星期五都好   可以快啲放假咁   哈哈 ~

今朝好好太陽   我問里奧大人帶唔帶遮好 ?!   佢話咁好太陽唔駛帶喎   唔帶把遮真係個袋無咁重㗎 ~

我話尋晚好開心呀   里奧大人話佢都開心   但點解同阿 mi 食飯   又唔同佢屋企人食飯喎   因為剪緊頭髮嘅時候   姑奶打嚟話約今晚做節   我話唔想去   所以佢叫里奧大人陪我 ~

我話我同佢哋傾偈好開心   因為可以暢所欲言   同妳啲家姐真係無咩好傾   成日來來去去都係講嗰啲   即係無話題囉   老實講   我唔出聲嘅話即係齋坐   咁妳認為我會開心 ?!   其實佢仲係唔明一樣嘢   就係傾偈都要搵啱對象   我多嘢講   但我唔會話同邊個都會多嘢講   好啱傾咁囉   真係要記住唔係妳啲親人就等如同我好啱傾   等如我同我堂呀哥細佬都無乜嘢好傾   唔係只係你啲屋企人係咁囉   呢個世界唔係樣樣嘢都係等如 ~

有啲餓   所以食芝蛋治   都係叫完唔想食咁   之後家姐打嚟傾偈   真係好邪囉   我就係驚佢坐車想瞓覺   所以唔 Whatsapp 佢   點知佢又打嚟   次次傾親都起碼 10 分鐘   我又唔會一路食一路傾   搞到好忙咁   除非好趕時間先會咁做囉   傾完都 8 點 45 分喇    要嗱嗱聲食喇 ~

番到菇場仍然做 Report   不過唔知係咪散光加深咗好多   啲數字完全濛查查   定之前喊得太勁   對眼濛查查呢   我已經一番工就飲杞子龍眼喇噃   下次再加菊花先   我驚太涼咋   如果唔係會菊花杞子龍眼囉 ~

Lunch Time 出去行陣   去萬寧買香口膠同薄荷糖   之後再去惠康買 8 支參蜜比里奧大人   因為 $8.8/2 支好抵   但重到我呢   再去買埋菠蘿叉燒包就番菇場喇 ~

Eclipse ($12/2 包) / Airwaves ($12.9/包) - 好抵呀   因為會員仲要有 95 折 

無啦啦情緒超勁低落   所以買完個包都無胃口食   唔知尋日係咪見到自己想見嘅人   所以今日見唔到   有啲失落咁   其實自己都幾十歲人   都唔明點解仲會咁 ~

終於做哂 Report   了咗心事   可以 Hea 等放工 ~

如果出面落雨   電話會顯示有雨點   咁我覺得可能係講緊整個香港   唔係菇場呢區   點知一出門口就落雨   唔密但好大粒囉   但懶得番菇場拎遮   所以跑去巴士站 ~   

點知落車先嚟超級勁大雨   又無瓦遮頭   更加要跑得快   買埋燻蹄就跑番屋企   經過商場凍鬼到呢   但唔入商場又要淋雨喎   點知一到屋企樓下居然細哂雨 ~

好在今晚唔駛開鑊炒嘢   所以即沖涼啦   唔係好易冷親 ~

里奧大人 6 點 45 分放工   咁我都烚定隻紅豆糉喇   烚夠 25 分鐘都應該熟喇啩   一隻糉咋喎   烚完又要預備滾粟米湯同煮福麵   搞到個人有啲熱添   哈哈 ~   
   
是日懶餐 - 燻蹄 (外賣) + 粟米蛋花湯 

燻蹄 (外賣) - 好想食啲酸醋呀   同埋好鍾意食燻蹄啲皮   爽爽哋好味呀 ~  

粟米蛋花湯 - 今次勁啦   睇完 Expiry Date 即開罐頭   點知原來係粟米粒   我頂   但我好想飲熱嘢暖肚呀   所以照開粟米湯   我飲到一大半真係好想嘔   頂到上心口呀真係   所以抖多 15 分鐘先再飲   今次好驚呀飲到 ~

搞掂哂就休息   同里奧大人一齊睇狼牙捧   真係幾好睇   最緊要呢集唔駛用腦諗嘢   哈哈 ~

睇下電視又打下機   原來已經 11 點 45 分喇   我要瞓先喇   聽日要番工呢 ~