蜜糖煎雙丸 + 蒜蓉蒸脆肉瓜 + 齋滷味 (外賣) ( 22-JUN-2016 )

( 22-JUN-2016  WED )

今朝里奧大人上大陸   叫佢記得帶麥茶   之後佢又入房   我再叫佢記得帶麥茶   哈哈   佢話帶咗啦   快啲瞓啦   所以今朝 7 點 45 分先起身   比自己瞓多 15 分鐘   精神好多㗎 ~

早餐食奶醬多   如果我自己整呢   會每個角落都搽勻花生醬   如果出街食多士   我搽牛油唔會一 Pat 咁撻喺塊多士度   每搽勻哂㗎   所以家姐最鍾意我幫佢搽牛油多士   佢話我好有心機喎 ~

菇場忙呀   一放假前幾日就特別忙   明明唔急嘅都要做埋去   平時點催又唔比   麻鬼煩 ~

Lunch Time 出去買酸辣米線番菇場食   酸酸辣辣真係好正   不過我都唔食咁多喇   之前話唔食嘛   依家好似連食幾餐咁 ~

仍然忙到爆炸   好在放工前都搞掂哂 ~

本來想搭地鐵   但都係搭番巴士算喇   真係好唔鍾意搭地鐵嘅感覺 ~

唉   迷你倉仲燒緊   我覺得仲大煙過今朝添呀   真係辛苦哂啲消防員 ~

咁我等落車嘅時候   有對唔識嘅阿婆阿伯講迷你倉呢單嘢   之後阿婆話死一個咋 ?!   阿伯好激動話佢呀   話死一個仲唔夠呀 ?!   要死一百個先夠呀 ?!   阿婆以笑遮醜囉   但阿伯仲係咁話死一個咋   係咪死一百個先夠呀 ?!   係咁講係咁講囉   阿婆又係抵鬧嘅 ~

去街市買餸   之後再去 Taste 買車厘子   但得番 Pack 好嘅   咁我唔買 lu   唔鍾意 Pack 到啲車厘子扁哂咁   最後買咗香蕉同急凍蝦同齋   買完即番屋企 ~

今晚煲冬瓜祛濕水   所以又係一爐走天涯   所以要好好把握時間呢 ~ 

里奧大人 7 點半已經到九龍塘   咁我都開始煮嘢喇 ~

是日懶餐 - 蜜糖煎雙丸 + 蒜蓉蒸脆肉瓜 + 齋滷味 (外賣) 

蜜糖煎雙丸 - 衰里奧大人見到碟嘢   第 1 件行問係咪過咗期   我話啲丸唔會過期㗎喎   但其實 樽燒烤蜜糖就真係過咗期   所以想清埋去   哈哈 ~  

蒜蓉蒸脆肉瓜 - 3 條脆肉瓜只係 $6/份咋   即買   點知買完哂嘢之後再經過聽到佢話 $5/份   但頭先唔買又驚比人買哂嘛   激死我 ~  

齋滷味 (外賣) - 勁想食就買啦   但真係好飽   所以食剩大半盒   咁留番聽晚食啦唯有 ~  

搞掂哂都 9 點   之後即開機洗衫   沖埋涼就熨衫   今晚完全無停過咁款呀 ~

今日體力勞動得太緊要   11 點左右都要瞓喇 ~