茄汁洋蔥豬扒 + 蒸翠玉瓜粒 ( 13-MAY-2026 )

( 13-MAY-2026  WED )

今朝瞓到 7 點未夠就起身   雖然一覺瞓天光   但起身嘅時候有啲頭痛 ~

同里奧大人去買早餐   之後就去佢公司   食完再坐陣先番工 ~

家姐好多時都會影佢食嘅早餐比我睇   今朝佢食米粉仲叫我估幾錢   之後話似以前媽咪喺街市買嘅炒米粉味道   嗰時仲有紅豆糉都好食㗎   我同家姐都話食唔番呢個味道了 ~

所以有時食啲嘢   就好自然諗起細個同家姐媽咪一齊食過   會好開心呢   同埋估唔到家姐又會記得   哈哈 ~

菇場唔忙   可以做自己嘢喇 ~

我拎咗芝麻丸番公司食   咁我比咗船頭同阿齋食嘛   我話姑奶喺暖心芝作買嘅   阿齋話太子有間   船頭話荃灣   我話知道太子有咋   之後肥仔豪話有兩間店㗎   估唔到佢全程聽我哋講嘢   哈哈 ~

船頭請食 MUJI 薄荷朱古力   $28 得 6 塊咋   依家食零食真係唔平了

今日都會去一田買嘢   但番嚟先叮飯   因為胃有啲痛唔想食住   之後船頭話一齊去一田喇 ~

我問船頭推唔推車 ?!   佢話唔駛啦   因為我話只係去買豬肉片同清酒   咁佢見到蝦子麵有貨即買 2 包   護髮素有貨又買 3 包再買支日本豉油   咁我都買 3 包護髮素再加支日本豉油   我話咁拎唔掂喎   我去拎架車先   之後佢都去拎啦   拎完又再買日本初生蛋同 2 包洋蔥   最後排隊再買包薯片   我話次次唔推車反而會買好多嘢   佢都話係啦   哈哈 ~

買完已經 12 點半   要番菇場開餐喇 ~

北海道雪華豚急凍豬梅片 (特價 $79.9/2 件) / 四季山茶籽油護髮素補充裝 X 3 (特價 $15/包) /

貝克曼污漬剋星 (去油類 50ml) ($32.5) / TAK料理專用清酒 (特價 $20) / FJ 富士九州醬油 (特價 $21.9)

船頭嘅   真係唔拎車點得啦

船頭話上次做做下嘢   諗起溫總話好忙但放一星期假   又將啲嘢比我做   覺得好嬲   佢話我哋雖然都係聲大大但係做嘢之人囉   唔會成日大大聲話好忙   只係默默咁做   同埋人哋見到我哋行嚟行去就知道我忙啦   駛咩強調呀 ~

依家到溫總幫佢同阿齋   溫總做上游就求其做   下游條數實對唔番   但就教番下游應該點做   我話佢做上游嘅時候做啱咪得囉   真係黐鬼線 ~

唔忙就做自己嘢   放工即走   買埋麵包就番屋企   但里奧大人話有突發事情要處理   起碼 6 點半先走   咁我都去惠康買菜同去屈臣氏買 Cream   費事聽日落大雨出唔到街呀 ~

極潤保濕水分露 ($148/件 第二件半價 平均 $111/件)   我再減 $50 Coupon   即係 $82/件就好抵   所以買比里奧大人搽喇

買完都即番屋企預備晚餐   但原來只係 6 點 10 分   我仲以為起碼 6 點半添 ~

里奧大人 7 點番到屋企   可以即刻食得喇 ~

是日晚餐 - 茄汁洋蔥豬扒 + 蒸翠玉瓜粒

茄汁洋蔥豬扒 - 要清茄汁就整豬扒啦   咁我係求其煮㗎咋   但里奧大人話好味道   因為佢鍾意食茄汁   哈哈 ~

蒸翠玉瓜粒 - 擺咗 2 日喇   今晚一定要食呢 ~

洗埋碗抖陣就去做機   不過 Full 哂諗住出街行   但里奧大人突然醒起要番公司做啲嘢   咁我都番屋企 lu   諗住去沖涼   但聽到門口有嘟嘟聲   原來係里奧大人   佢話無帶鎖匙同埋都係有啲攰   所以都係番屋企算喇 ~

沖埋涼抖陣就熨衫   之後同里奧大人一齊睇 "低智商犯罪"   今晚都係睇 2 集就夠 ~

睇完再睇陣 Youtube   今晚 11 點先瞓 ~