茄子燜豬腩片 + 泡菜豬肉湯 ( 20-MAY-2026 )

( 20-MAY-2026  WED )

感恩又一覺瞓到天光呀   仲可以慢慢沖涼洗頭   唔駛整早餐真係可以慢活   哈哈 ~

今朝同里奧大人去買早餐   之後就去佢公司喇   食完坐多陣先番工 ~

菇場忙呀   阿齋突然行過嚟好自然咁拎把風扇   仲知我放喺邊   呢下先好笑 ~

Lunch Time 出去買茄子   之後就周圍行下   今日都幾焗熱   所以行咗半個鐘就去買午餐喇   因為已經行到出汗   要快啲番菇場嘆冷氣喇   我本來想食湯粉   但最後都係買兩餸飯   咁唔駛咁熱呀   哈哈 ~

咕嚕雞拚蘿蔔牛腩

阿齋話拎咗我把風扇   船頭聽到好愕然話妳點會知佢有把風扇 ?!   佢即刻答話我有兩把㗎   因為我有把小米做後備   有時用開嗰把無電就即用佢㗎喇 ~

忙下停下   好快放工 ~

放工去大生買豆腐   買完就即番屋企 lu ~

今晚諗住里奧大人無咁早放工   但估唔到佢 6 點鬆啲就番到屋企 ~

里奧大人話今日同 MM 傾偈   話佢依家咩都會講   以前唔會咁做   我話上兩次佢都講好多嘢啦   里奧大人話佢喺我面前真係講好多平時唔會講嘅嘢呀 ~

我話我今日先喺度諗   同你啲同事仲熟過我啲同事   起碼會夜晚食飯   之後里奧大人話每次我同佢啲同事一齊食飯   佢哋會特別開心多嘢講   我話可能好少機會咁一齊食飯   所以就開心呢 ~

是日晚餐 - 茄子燜豬腩片 + 泡菜豬肉湯

茄子燜豬腩片 - 之前喺一田買嘅北海道雪華豚急凍豬腩片   真係完全無羶味   下次特價會再入貨   今次用黃豆醬燜   咁都好味道㗎 ~

泡菜豬肉湯 - 唔想一個餸咁悶   咁之前又買咗泡菜   所以想整泡菜湯   因為里奧大人鍾意食呀   頭先仲特登買豆腐   不過最後都無加   因為我仲係好飽   同埋又要食埋尋晚食剩嘅意粉   真係食唔落豆腐   里奧大人話個味道啱啱好   咁就好喇   但我試咗啖係覺得有啲辣   仲諗住個樣白雪雪無咩味添   哈哈 ~

洗埋碗抖陣就同里奧大人去做機   依家開始做半個鐘頭   希望之後可以再做耐啲呢 ~

番到屋企即開機洗衫   啱啱開完機就見到里奧大人   我話咁快嘅   佢話我做咗半個鐘頭機   所以咪覺得快囉 ~

搞掂就沖涼   抖陣就熨衫喇 ~

睇下 Youtube   今晚 11 點先瞓 ~