泡菜炒豬梅片 + 黑毛豬午餐肉 + 超甜粟米 ( 28-MAY-2026 )

( 28-MAY-2026  THU )

尋晚去完廁所   感恩好快瞓得番呀   同埋瞓得都唔錯呀   今朝 7 點 20 分都起身 lu ~

早餐食菠蘿油   食完就去里奧大人公司坐陣先番工 ~

菇場忙下停下   好快又到 Lunch Time ~

今日同船頭 阿齋飲茶   尋日阿齋話星期五飲茶   點知夜晚 Whatsapp 話今日   因為西瓜上工廠   可以晏啲先番   哈哈 ~

我同阿齋去酒樓先攞位先   揀咗兩樣點心先   等埋船頭嚟先再揀 ~

我哋見到鴛鴦炒飯   話依家好少見到呀   之後佢話細個同屋企人飲茶實會食雪菜火鴨絲窩米   我話我都係呀   真係咁啱都有嘅   再話仲有叫錦滷雲吞   我話同妳係咪坐隔離枱呀   食嘅嘢一樣嘅   哈哈 ~

傾完就見到船頭   我哋揀咗 6 樣點心   唔夠先再叫 ~

鮮蝦炸雲吞 ($28)

鮑汁鳳爪 ($45) - 呢個好入味   我哋仲叫咗囍盈蝦餃皇 ($35) + 鮮竹牛肉球 ($28) + 蜂巢炸芋角 ($31) + XO 醬炒腸粉 ($48)

一路食一路傾   咁啱阿齋屋企有啲麻煩嘢   好在船頭有啲提醒   希望可以幫到阿齋啦 ~

講開我依家做緊嘅嘢   佢話阿爽本身唔係醒   請個人番嚟頂溫總   蠢嘅又驚自己要做埋佢嗰份   叻嘅又可能有威脅到連工都無埋   所以佢好無奈咁留溫總算喇   咁就死得啦   所以佢哋部門零舍多古靈精怪嘢出現囉 ~

阿齋話佢成隻櫃無入資料都可以覺得無嘢   仲叫阿齋唔好咁惡   佢最鍾意叫人唔好勞氣   但接觸呢個人真係好難唔勞氣   幫佢跟嘢又唔知自己講咩呢下慘嘛   表達能力真係有問題   唔係點會個個對住佢都咁火滾吖 ~

之後阿齋同船頭講話濕疹唔可以咁忙   船頭即刻叫佢退休   話唔會叫妳將啲嘢比人哋做咁衰格   哈哈哈哈 ~

今日傾到 1 點 20 分先走   好在船頭望下幾點咋 ~

飲茶埋單 $276   阿爽知我哋飲茶   仲話茶位係十二蚊   真係佢唔講都唔知   呢間係阿齋想去嘅   之後佢話下次去另一間試下 ~

菇場唔忙   好快放工 ~

放工即走   里奧大人話去做機先   咁無問題啦   我番到屋企預備晚餐   之後佢都番到屋企   我叫佢沖涼先   反正未食得   同埋我煮越南河粉   佢沖埋涼先煮就啱啱好喇 ~

是日晚餐 - 泡菜炒豬梅片 + 黑毛豬午餐肉 + 超甜粟米

泡菜炒豬梅片 - 奇怪點解份量咁少   原來之前我分開咗 2 包   好在有泡菜充撐下   哈哈 ~

黑毛豬午餐肉 - 唔想得一樣餸咁悶但又唔想去買一個餸   所以就焗午餐肉 lu ~

超甜粟米 - 好在尋日買咗粟米   咁今晚就有蔬菜食喇 ~

洗埋碗抖陣就去做機   依家起碼做半個鐘呢 ~

沖埋涼就開機洗衫   里奧大人熨 2 機衫用咗個半鐘   佢真係好有心機熨㗎   我真係求其到爆   哈哈 ~

等佢熨完衫就睇 "低智商犯罪"   都係睇 2 集就夠   因為已經 10 點 45 分要瞓覺喇 ~