$498 (二人套餐)
麥啤酒浸原味德國脆皮鹹豬手 - 呢個好味呀 個皮又好脆 里奧大人話下次會再同我食呀 哈哈
柚子醋三文魚沙律 - 沙律菜都幾爽脆 但我本身唔係咁鍾意食㗎 平時同里奧大人或者家姐食嘢 如果有沙律菜一定叫佢哋食哂㗎
煙三文魚蟹籽忌廉意粉 - 我都幾抗拒忌廉呢樣嘢 但估唔到呢個忌廉意粉咁好味道 不過食剩半碟要打包呀
西班牙風乾火腿辣肉腸薄餅 ($148) - 我無食到呀 所以食剩 3 件又要打包了
是日餐湯 - 我都鍾意飲南瓜湯
( 19-MAY-2026 TUE )
感恩一覺瞓天光呀 個人精神真係整早餐都快手啲 哈哈 ~
早餐食甜餐包 今次搽咗牛油花生醬 估唔到里奧大人食到津津有味 咁下次我都咁搽喇 ~
里奧大人話我條裙一定唔係佢熨 因為好皺但係有熨過嘅 我話深色碎花都睇到 ?! 佢話係呀 之後再話佢着緊條褲都唔係佢熨 我話咪咁啦 依家要我出手就將就下啦 佢都忍唔住笑 哈哈 ~
菇場忙呀 開心開心 ~
依家個位隔離有個櫃 所以我都將抹手紙放喺櫃面 咁可以大家一齊用 今朝船頭拎嚟用 佢話真係有 Refill 喎 因為我用得都好密嘛 一得閒就撕開啲抹手紙再對摺入番個包裝袋 拎起上嚟方便好多㗎 ~
Lunch Time 蒸完飯就去一田行下 之後又去大生 諗住買 Zero Cookies 比林謝謝 但最後比我見到雷神朱古力仲要特價 所以買比林謝謝 同埋順便問家姐要唔要 估唔到佢都要呀 所以買夠 10 包喇 ~
家姐真係好搞笑 問我係咪細包啲 ?! 但其實佢又唔知 哈哈 今次影咗價錢比佢睇 佢話好抵呀 但佢之前有特價又無買 仲以為佢食到厭添
日本有樂雷神杏仁榛果朱古力 / 日本有樂雷神果仁朱古力 / 日本有樂雷神草莓朱古力只係 $24/2 包 所以我買 2 包士多啤梨同埋 1 黑 1 白比佢喇 林謝謝就 1 士多啤梨 1 白 我就同家姐一樣嘅
買完都要番菇場開餐喇 因為已經 12 點 15 分呢 ~
忙到 4 點就搞掂 終於可以抖下 ~
越南買嘅咖啡餅乾 估唔到幾好味喎 同埋我鍾意食薄身嘅餅乾呢
放工即走 今晚去九龍灣食飯 但里奧大人唔可以放工即走 所以我自己行下商場先 ~
里奧大人 6 點鬆啲到九龍灣 佢一見到我就話今日喺所有同事面前讚我 連皇上都開聲讚埋我 初初仲以為佢講笑添 不過佢其實次次一諗起某樣嘢就會諗起我 仲次次都會讚我 話我做得好好 咁我都承認係㗎 ~
難得里奧大人喺度就去仁御堂買糙米 有佢幫手拎真係差好遠 依家拎唔到咁重嘢呀 ~
三色糙米 ($8) - 星期日煮嚟食 估唔到口感唔錯 最緊要里奧大人都話好食 所以我買咗 8 包
買完就去 DAISO 買獨立包裝嘅牙簽 順便買盒比船頭 之後再行陣 DONKI 就去餐廳喇 ~
今次食飯真係算即慶 里奧大人不嬲都有同林謝謝 Whatsapp 嘅 咁星期日我突然提起林謝謝 之後里奧大人話林謝謝啱啱 Whatsapp 話搵到新工 咁我即刻話約出嚟食飯啦 我都好耐無見佢呀 所以就約今晚食飯喇 ~
佢同里奧大人講話請我哋食飯 因為里奧大人以前成日幫佢解決好多問題 我話佢請就唔係咁好喎 之後里奧大人話梗係我哋請啦 我話咁就好喇 順便慶祝佢搵到新工呢 ~
最搞笑林謝謝唔知喺邊度 所以里奧大人去接佢 ~
見番佢真係好有親切感 我估都有 4 年無呀 咁我哋一齊叫嘢食 佢話我好似以前一樣咁爽朗 其實之前番小組 啲弟兄姊妹又係咁講 ~
里奧大人同林謝謝真係合作無間 特別係疫情嘅時候 有時放工都打嚟搵里奧大人 好記得有次佢仲喊添呀 好在真係打比里奧大人咋 咁起碼唔駛屈住屈住呢 ~
林謝謝話好少男性朋友 佢都想知道男性喺工作上嘅諗法 始終男同女嘅諗法係好唔同呢 咁呢樣就真係㗎 男係比較果斷 我公司都係咁 如果唔係就會頭啖湯就變為水尾㗎喇 ~
講開新工 我話雖然經驗好夠 但都要覺得自己係新人 始終新環境新人事新作風嘛 ~
佢再講自己人工 呢樣真係好感受到神為佢嘅預備 我覺得係可以講見證添呀 所以真係好為佢感恩呢 ~
而林謝謝都係我義工導師 嗰時唔識點樣同對象傾偈 佢教咗我幾個方法 我真係跟住做 個人真係無咁驚 ~
今晚真係無所不談 我仲講番以前輔導學過嘅嘢 好在真係講咗呢個話題 因為林謝謝就係啱啱遇到呀 ~
好在餐廳坐唔滿 我哋先可以傾兩個半鐘 哈哈 ~
一齊行去地鐵站 咁我同里奧大人就行下德福 因為要等 10 分鐘車呢 ~
我同里奧大人講話唔記得影相呀 之後里奧大人收到林謝謝 Whatsapp 話頭先唔記得影相呀 真係咁啱都有 哈哈 ~
番到屋企已經 10 點半 要即刻沖涼喇 ~
林謝謝送比我㗎 真係好邪呀 我本身諗住買開心果味麻糬比佢㗎 但見 6 月到期先唔買咋
睇埋新聞 今晚 11 點 15 分先瞓 ~
沒有留言:
發佈留言