五香滷水燜雞翼 + 菜心 ( 18-MAY-2026 )

( 18-MAY-2026  MON )

感恩一覺瞓天光呀   話哂星期一都想精神啲嘛 ~

早餐食甜餐包搽花生醬   因為好想快啲清哂樽花生醬呢 ~

我同阿隱打招呼   佢話出面個天灰灰暗暗想落雨   但見到我陽光嘅笑容   當堂即刻 Bright 哂   咁我不嬲都係笑住同人打招呼嘅   間唔中又傾兩句   所以佢哋清潔姐姐初初嚟到   以為我哋係佢公司同事添呀 ~

菇場超級忙呀   其實都好鍾意忙㗎   因為啲時間過得超級快 ~

Lunch Time 蒸完飯就出去行陣   經過友誠又入去睇下   見到牛油卷開箱仲要只係 $18   所以即刻 Send 張相比家姐睇   但手快快 Set 咗睇完會 Delete   家姐話以為咩嘢相咁神秘   之後我問佢 1 包夠唔夠 ?!   佢問點解會咁問 ?!   我話可能妳覺得咁抵會買多盒嘛   佢話點為知抵呢 ?!   妳都無影到價錢   真係笑死我呀   平時我一定影埋價錢家嘛 ~

嘉頓牛油卷 ($18)

我放低盒牛油卷喺枱面就去斟水   船頭同阿齋見到盒餅都話鍾意食   我話呢盒係 Share 食㗎 ~

仍然忙呀   忙埋聽日應該搞掂 ~

放工即走   買埋麵包都即刻番到屋企預備晚餐   咁啱里奧大人就做完機番嚟   所以叫佢沖埋涼先食飯 ~

是日晚餐 - 五香滷水燜雞翼 + 菜心

五香滷水燜雞翼 - 前日燜㗎   我仲一次過落哂 6 隻蛋   因為我記得好似 18 號到期   再加埋尋日食剩嘅漿爆豬肉丸   我同里奧大人講話今次啲雞翼好入味   可以出得大場面呀   佢笑住話咩嘢大場面 ?!   我話即係可以整比人哋食   不過要強調係李錦記五香滷水汁煮嘅啫   哈哈 ~

菜心 - 難得咁甜真係想食多啲   好在仲未食厭 ~

洗埋碗抖陣就去做機   今晚可以做半個鐘 ~

開機洗衫就沖涼   食埋蘋果先熨衫 ~

里奧大人食蘋果一定批皮   所以叫佢批埋我嗰份   哈哈

里奧大人 9 點開 Zoom Meeting   咁我就睇孫穎莎喇 ~

估唔到 11 點 10 分先開完會呀   不過我都睇到 11 點 20 分先瞓覺呢 ~