韭菜餃拚鳳城水餃 (外賣) + 昆明生菜 ( 5-JUN-2023 )

 ( 5-JUN-2023  MON )

今朝同里奧大人 8 點 40 分都醒咗   梳洗完畢就去食早餐喇 ~

依家習慣去完旅行都會請一日假休息   咁樣個人真係無咁攰㗎 ~

咁尋日又出咗成日街   今日先叫做真正休息   哈哈 ~

食完就去買餸   條街焗熱到呢   真係龜速咁行 ~

買完祛濕料就買冬瓜   佢將一大個切開一片片   每片 $5   咁我問個職員有無 1 斤重 ?!   因為我想買 1 斤半至 2 斤嘛   佢就串串共話 1 斤幾啦   呢度買係最平   我心諗都黐鬼線   我依家唔係要平喎   我係想知道如果唔夠 1 斤就買夠 2 片咁啫   天氣熱真係唔好去街市買嘢   個個都好似食咗火藥咁 ~

頭先買菜又係咁   個婆婆想要上面嗰排菜   但職員聲大大話只能要下面嗰排   最後個婆婆無買到走人   之後個職員就聲大大話都唔明點解啲人咁怪   係都要上面嗰排   但將心比己   當妳自己買嘅時候都可能係想咁囉 ~

差唔多番到屋企就開始落雨   唔怪得頭先咁焗啦 ~

沖埋涼就煲冬瓜祛濕茶   之後又睇下電視 ~

2 點師傅嚟睇雪柜   不過都係整唔到   但希望校完個制會好啲啦 ~

抖到 2 點半就出去食下午茶   因為難得放假想出去食   同埋平日唔多人   呢下最好 ~

招牌豬扒煎蛋蔥油撈麵 - 好味道呀

豬扒都算大塊

花生醬西多士 - 食完鹹要食甜   哈哈

食完去超市買生果   買完都走喇   唔想行咁耐   哈哈哈哈 ~

番到屋企即刻開機洗衫   之後灘喺梳化唔願郁喇 ~

今晚只係淥嘢   但係 8 點先開餐   其實想早啲食   但又唔餓所以無計啦 ~

是日懶餐 - 韭菜餃拚鳳城水餃 (外賣) + 昆明生菜

韭菜餃拚鳳城水餃 (外賣) - 唔想食飯同麵  所以食水餃最好 ~

昆明生菜 - $10/斤   但有唔少係爛囉   激鬼死 ~

洗埋碗又再沖涼   之後同里奧大人睇 "社內相親" ~

呢筒珍寶藍莓由 $49 減到 $45   其實真係食生果好貴囉   好在里奧大人話甜咋   咁就值得買喇

聽日回復正常生活喇   所以今晚 11 點唔夠都瞓 lu ~