慢慢行 ♡ 首爾。美好回憶記錄 ( MAY 2023 )

3 月左右   有件好感恩嘅事   所以里奧大人話去旅行   不過之前佢部門啲同事已經攞哂假   只係得番 5 月同 10 月可以請假   咁就揀 5 月去旅行喇 ~

今次事出突然   咁我想揀去東南亞 ~

韓國 3 月中前仲要整 K ETA   所以都唔諗住唔去 ~

泰國 5 月撞正大選   上次經歷過紅衫軍事件   所以肯定唔會去 ~

台北去到悶   所以更加唔會去   哈哈哈哈 ~

之後阿花話韓國唔駛再整 K ETA   所以同里奧大人決定去首爾喇 ~

4 月 15 日即訂機票同酒店   原來都好 Full 下 ~

雖然我都有睇首爾遊嘅 Youtube   但好多都係 3 年前   咁變化都應該大啦   所以由決定到出發前   其實瞓得唔係咁好   始終我對首爾好陌生嘛 ~

里奧大人驚我 Plan 行程辛苦   直頭叫我唔好 Plan 添呀   話行到邊食到邊   知到大站就可以   但我覺得好無安全感呀 ~

咁阿齋好鍾意韓國   所以我叫佢幫我 Plan 行程   仲幫我寫埋出嚟   今次去首爾   真係感恩有佢幫手呢 ~

今次去首爾   最遺憾係去唔到 Fantangio   本來我係 Plan 去的   但因為 Binnie 嘅離去   我會覺得帶住傷感去參觀   我好肯定自己會喊囉 ~

住宿方面 - 酒店位置一流   可能我鍾意小區位置   比較無咁多人同嘈   同埋其實酒店去地鐵站都好方便   加上機場巴士直頭喺酒店對面   所以覺得仲方便   始終我鍾意搭機場巴士多啲嘛   一落車就到酒店   唔駛拖喼行萬里長城   感覺真係差好遠㗎 ~

天氣方面 - 出發前睇首爾天氣   29 日號係雷雨   30 日落雨    31 日多雲   6 月 1-3 日先開始天晴   我預咗頭幾日行 Shopping Mall 咋   但好感恩去到首爾   完全無落過雨   仲好天到不得了呢 ~

不過天氣真係好乾燥呀   我真係日日飲好多嘢又搽哂 Cream   我都覺得內外都乾咁呀 ~

住喺首爾啲人成日話早晚溫差比較大   夜晚會涼好多   但我又唔覺喎  不過臨番香港前嘅一日   真係感受到朝早好凍囉   其他日子真係覺日夜都咁熱   哈哈 ~

食物方面 : 我都好鍾意食嘅   但就唔會話有驚喜咁呢   同埋好多食物嘅份量都好多咁   搞到好多嘢都唔敢試   依家知道份量約莫咁上下   下次再嚟就知道點食法 lu ~

手信唔會買太多   我個人覺得韓國零食比較伏   所以我喺香港都好少買韓國零食 ~

29/5

最開心同里奧大人食到部隊鍋   因為話去首爾嘅時候   我問佢有咩想食 ?!   佢答部隊鍋   哈哈

30/5

KAKAO FRIENDS   我 Plan 行程都一定要去呢度㗎   所以住弘大真係好方便

去荒謬的生肉食正宗韓燒   哈哈

明洞行街

31/5

南怡島一定要去啦

晨靜樹木園都係

好掛住呢 3 隻狗仔   哈哈

1/6

韓屋都一定要去睇

我鍾意食呢啲韓餐   因為有好多涼拌菜小食

@ piggy bank   喺韓國真係食咗好多肉   但豬肉係好味嘅   完全無羶味呢

2/6

橋村炸雞   喺韓國唔食炸雞   就好似無去過韓國咁呀   哈哈

今次去旅行經歷最深刻就係搭地鐵喇   自問都算行得   加上去旅行要行就更加無問題   因為開心嘛   但首厭啲地鐵站好焗   次次一入去就有缺氧嘅感覺   真係想行快啲都唔得   再加上又唔熟   真係搵個站都好耐   第一日已經行到腳痛呀   哈哈 ~

喺首爾呢幾日   我發覺當地人真係比較 Cool   就算係服務性行業都係咁   所以我有時都唔敢周圍影相   始終文化又唔同嘛   一陣令到佢有誤會就唔好啦 ~

我覺得今次玩得唔夠盡慶   同埋唔太滿意今次行程嘅安排呢 ~

May 29, 2023  07:15am (HKG) --> 11:50am (仁川國際機場 T1) - 20 kgs

Jun 03, 2023   12:45pm (仁川國際機場 T1) --> 15:30pm (HKG) - 25 kgs

HK Express 機票: HK$5,406

9BRICK Hotel (6D5N): HK$4,730

亞太區 7 日抵玩套餐 ($78x2)

保險費好似每人 HK1xx