韓式辣醬煮雞肶 + 西蘭花 ( 8-JUN-2023 )

 

( 8-JUN-2023  THU )

尋晚去咗次廁所   但好在都好快瞓得番   呢兩晚都無熱醒   所以瞓得比較舒服 ~

早餐食咖啡瑞士卷   唔駛焗熱麵包真係快手好多   哈哈 ~

無啦啦又落勁大雨   但落車就停雨   所以更加熱 ~

行番菇場嘅時候   感覺狀態回勇了   感恩感恩 ~

菇場唔太忙   但做下呢樣嗰樣   時間都過得好快 ~

Lunch Time 出去行啦   始終唔想成日坐嘛 ~

買完牛腩河都番菇場喇   始終食湯粉要慢慢食嘛   同埋依家又熱   真係要抖陣先食呢 ~

本來今日食米粉   但諗諗下都係想食河粉   點知又比阿齋捉住傾偈   傾咗短短 15 分鐘   我碗腩河已經無哂湯喇 ~

仍然唔忙   傾下偈又好快放工了 ~

放工即走   里奧大人今晚考完試先番屋企   咁我都可以慢慢預備晚餐喇 ~

差唔多煮完   里奧大人都番嚟   原來已經 7 點半 ~

感恩里奧大人考到非常好嘅成績   實在喺神嘅恩典呢 ~

是日晚餐 - 韓式辣醬煮雞肶 + 西蘭花

韓式辣醬煮雞肶 - 用燒汁再加韓式辣醬醃雞肶   咁又係食雞肶好悶嘛   所以加咗 4 條海鮮卷   將佢切粒   咁樣整埋就大碟啲呢 ~

西蘭花 - 又係時候食啲深色菜   咩都唔蘸都好食㗎   但其實我覺得食菜就係應該要清清哋   哈哈哈哈 ~

洗埋碗就開機洗衫   沖埋涼就諗住休息   但里奧大人話溫咗幾晚書   依家考試完咗   所以想睇 "社內相親"   咁一定陪佢啦 ~

之後 10 點半就睇 "好睡好起"   講點樣有好嘅睡眠   我覺得好多人覺得早瞓係蝕   真係唔明點解咁諗   咁早啲瞓就早啲起身囉   時間一樣咁用之嘛   同埋我一唔夠瞓就會甩頭髮   以前仲會鬼剃頭添呀   依家年紀大   仲更加唔到妳唔早瞓添 ~

今晚 11 點都瞓喇   其實頭先睇睇下都想瞓   因為成日聽到 "瞓覺" 呢兩個字   搞到好想瞓   哈哈 ~