芝士腸 + 黑椒煙鴨胸炒扁意粉 + 粟米蛋花湯 ( 1-FEB-2016 )

( 1-FEB-2016  MON )

嘩   咁快又 2 月喇 ~

今朝凍呀又   得 11 度咋   仲加埋落毛毛雨   濕凍最慘   個人又攰 ~

早餐食腿治   有時真係勁想買魚肉燒賣入去食   不過好似好樣衰咁   同埋無理由又多士餐又魚肉燒賣   好似好大食咁   哈哈 ~

菇場忙呀   好在 11 點幾忙完   可以抖下 ~

食埋 Lunch Box 就出去行下   諗住睇下有咩蘿蔔糕好食就買   想買龍門   不過等埋里奧大人睇下先   因為佢想食多過我想食呢 ~

幾勁呀   啲茄汁仍然喺塊豬扒上面   証明我唔係咁 Fing 嚟 Fing 去呢   哈哈

家姐打嚟話媽咪星期三出院   咁就好喇   我唔駛咁頻樸   大佬   我好似成個月都無真正休息過咁 ~

放工去 Taste 買餸   諗住買 Pack 韓國菇   點知得番幾包   又唔靚   激死我   所以即轉去買煙鴨胸啦   煮意粉都幾好味呢   呵呵 ~

番到屋企   解凍哂啲芝士腸就去熨 2 機衫   里奧大人 7 點打嚟話放工   熨多陣就熨完   可以專心煮飯喇 ~   

是日懶餐 - 芝士腸 + 黑椒煙鴨胸炒扁意粉 + 粟米蛋花湯

芝士腸 - 媽咪之前比㗎   好似成兩三個月   好在無壞咋   唔係又嘥咗   我好有心機慢慢煎呢   又比啲油彈到我叫救命 ~

黑椒煙鴨胸炒扁意粉 - 勁耐無煮黑椒嘢咁喇   所以勁想食呢   整呢個意粉真係簡單都不得了   真係懶人首選   呵呵 ~    

粟米蛋花湯 - 依家菜貴   細細 Pack 菜要接近 $20   真係買唔落手   但無理由又食娃娃菜嘛   所以就粟米湯喇 ~

今日終於知道放年假資料   真係黐孖根   唔好出年先講 ?!   咁同里奧大人講話開年嗰日   多數食完 Lunch 放工   佢話西瓜有無搞錯   放得果半日   應該放夠一日嘛   等佢可以有自由嘅時間   哈哈   正衰人   等我以為真係話西瓜衰   放得半日添 ~

洗埋碗就同里奧大人去德福睇蘿蔔糕   諗住買龍門呢個牌字   咁試食咗一粒仔   但唔知係咪唔熱定咩   口感超唔掂   所以去睇其他   見到八珍唔錯咁   所以買咗 Pack 大蘿蔔糕同細紅豆糕   再加多支特辣辣椒醬   食蘿蔔糕真係要蘸辣椒醬先好味㗎 ~

買完即番屋企   沖埋涼就睇下電視 Relax   里奧大人又食 mimi 脆   佢問我食唔食 ?!   我話梗係食啦   之後即拎個膠兜比佢   佢話拎其他嘢都無咁快   一拎嘢食就最快   哈哈   之後條友比得嗰 4 條我食   仲問我夠唔夠 ?!   我話梗係唔夠啦大佬   佢又再比多幾條我   我話好似乞食咁   哈哈 ~

11 點唔夠即瞓喇   好鬼凍呀   想早啲入被竇   但其實上床果下係最凍   因為床單同張被係凍冰冰   依家同里奧大人同一時間瞓   所以等唔切佢整暖我個位   佢以前會早啲入房睇書   會坐暖我個位㗎   依家無啦   係時候扮下慘先得   哈哈 ~