翠河餐廳 @ 官塘 ( 3-FEB-2016 )

栗子炆滑雞煲

翠肉瓜炒魚鬆 - 好鹹   仲諗住清清哋添

( 3-FEB-2016  WED )

今朝我去廁所   一入房里奧大人問幾點   我話 7 點 10 分   之後無耐佢話起身   反正都差唔多時間要起身   咁可以早啲番公司附近嘆早餐   但我就要早咗 20 分鐘起身囉 ~

好似無咁凍   但感覺好似潮潮濕濕咁呢 ~

8 點去到餐廳   咁食米粉餐啦   咁可以坐耐啲 ~

菇場唔太忙   可以做下自己嘢 ~

Lunch Time 未餓   咁行到 1 點先去買酸辣米線   番到菇場已經 1 點 15 分   咁真係要快啲食囉   因為太大陣味   但真係好鬼熱   點快食都要 20 分鐘   食完真係出哂汗   加埋件衫又厚   所以覺得突然間超級勁熱咁呀   哈哈 ~

里奧大人今日 4 點葵興見客   所以 5 點半都番到屋企   真係次次我出街就會放早   其實想陪佢多啲   因為我覺得媽咪好煩   成日做埋啲令人唔高興嘅嘢   所以唔係見佢出院   我都唔會見佢囉 ~

放工番媽咪屋企   點知佢出咗街   明知分藥就咪出街啦   好在我有鎖匙   可以入屋抖下   打比媽咪佢又話喺超市   咁我話分藥   佢又問工人   我聽到工人話分咗   之後佢收我線   真係黐線   我都未講完就收線 ~        

20 分鐘之後佢哋就番到屋企   咁媽咪去廁所   等佢去完我就問工人啲藥喺邊   平時食藥係幾點   因為有隻藥最煩   要分單日同雙日   真係唔可以分錯   咁我一路問工人   媽咪又一路叫工人快快快   話佢今日出院好開心   要出去行   又叫工人唔好嘈   由得我自己分   呢下我火滾鬧佢啦   我話嘈嘈嘈嗰個係妳呀   嘢又唔做喺度嘈   啲藥唔係話分就分㗎 ~

咁我分好哂   佢哋就出街   我分到 7 點就搞掂   落到翠河就同媽咪講   話唔好再食鹹嘢   腎功能指數去到 200 之後一跳就 400   所以要好好保護個腎   之後佢合埋眼鬼食泥咁話成日鬧成日話死   死咪死囉   食又死唔食又死   我話我唔關心妳   妳就慘啦   佢話唔駛我關心   我聽完之後   我對呢個人徹底失望   不過咁都好㗎   起碼我駛咁緊張妳   我留番啲精力去做其他嘢好過   起碼我會開心   我做人問心無愧   妳鍾意食咩就食咩啦   總之我唔會叫妳唔好食   但仍唔會主張叫妳食埋啲無益嘢   夠㗎喇   我好攰   唔想再理呢個人 ~

之後話唔舒服   抖唔到氣喎   話要噴氣   但頭先先噴完   又話食啲藥唔駛醫生話食都得   都唔知講乜鬼   都費事理佢   痴痴哋 ~

咁事實餐廳有啲焗   咁我叫佢出去坐   但工人話 5 分鐘之前先入嚟坐   頭先出咗去 5 分鐘又話凍   真係玩嘢 ~

咁打比家姐   家姐話唔好理媽咪  同埋工人話如果真係條氣唔順   係會有扯蝦聲   但媽咪又無扯蝦   所以我同家姐都覺得佢扮嘢   好煩 ~

食完就同家姐行陣萬寧   之後番屋企叫家姐 Double Check 藥 ~

媽咪叫我咃走嘛   因為阻住佢瞓   我心諗把口真係衰   無人睇妳就折墮 ~

佢瞓唔夠兩秒就話好唔舒服   問佢咩又只係話好唔舒服   鬼上身喎   之後話條氣唔舒服   咁唔鬼理   打去平安鐘   打完就話條氣好似舒服啲   黐鬼線   我話打咗就要入院㗎   唔係亂咁 Call 㗎 ~

之後工人話媽咪今日喺醫院   由床坐落櫈度話唔舒服   但我睇番啲度數   樣樣都係正常   同埋嗰下妳唔舒服就同醫生講啦   成日應講唔講  麻鬼煩 ~

3 個醫護員到咗   之後比佢聞氣   家姐聽到話媽咪體溫 33.7   咁又好低喎   鬼咩   一出院就叫工人推呢度推嗰度   又唔知自己住咗成個月醫院   適應咗醫院嘅溫度   今日天氣凍   仲出去成個鐘   唔冷親都偷笑啦 ~

工人跟車   我同家姐就慢慢行去醫院   最搞笑之後見到有救護車經過   我同家姐都 O 咀   話傾到完全唔記得媽咪架救護車走咗未   不過我話可能我哋習慣咗   講真   係得婆婆朝朝日日晚晚打𠼦問媽咪點   其他都無人問啦   住咁耐   人哋都懶得問   咁好正常 ~

咁工人陪媽咪入急診室入面   因為佢可以同姑娘講媽咪今日係咩情況   之後家姐入去啦   姑娘話媽咪根本無嘢   唔駛聞氣   但媽咪係都要聞   都黐黐哋 ~

講真   今次媽咪入急診室   我哋覺得佢玩嘢   大佬佢真係唔知我哋幾辛苦   真係好不知所謂 ~

我今晚係陪家姐咋   唔係一早番咗屋企 ~

咁工人無啦啦耳仔紅哂   我地驚佢發燒   之後家姐再入去睇媽咪   佢同家姐講話唔係講我是非   但真係好驚   因為佢話我頭先喺餐廳話如果媽咪死咗   佢要負責   但佢係工人   媽咪要食咩就咩   佢唔可以出聲話媽咪   咁所以家姐就同佢講   唔係幫太太   太太唔會咁樣話妳嘅   佢只係想嚇媽咪呢   之後工人原來係咁   佢放心哂   因為佢喺餐廳開始驚   驚媽咪有事我會賴佢呀 ~

我真係無咁講架   我話如果媽咪死咗   妳可能要番印尼會無收入㗎   所以妳記得唔好比媽咪再食鹹嘢呀   唔係要洗腎好辛苦   仲要我嘅語氣係好溫和㗎   之後我諗番   咁樣講可能真係嚇到佢   下次加多句   如果媽咪食都唔關妳事   唔駛驚   咁樣會好啲   哈哈 ~      

老實講   無工人照顧   我同家姐就死得囉   所以我一定唔會話媽咪一有事就賴工人囉   身體係自己   妳話工人無按時比藥妳食   導致妳身體有問題就話啫   依家工人叫妳唔好食   唔係害妳   所以身體有事絕對係自己攞嚟    同任何人無關囉 ~

同家姐 11 點走喇   家姐話媽咪已經轉咗去觀察病房   話如果一陣話要出院就煩   無的士無輪椅點番屋企喎   所以佢叫工人如果一陣出院就打比佢   等佢車佢地番屋企   所以我真係覺得媽咪好麻煩 ~

去到巴士站   家姐即有車   我推佢上車呀   佢話搭下班   咁可以陪我   我話 11 點幾喇   快啲番屋企啦   我一陣坐去旺角嘅小巴   咁會途經九龍灣   咁樣好快番到屋企 ~

番到屋企 11 點半  即沖涼洗頭   之後激氣架   所以差唔多 12 點半先瞓到 ~