大阪王將 @ 九龍灣 ( 23-FEB-2016 )

香辣野菜豚肉醬油拉麵   我覺得呢個湯底最好味     

 
和風炸雞 元祖天津蛋 五味海苔飯

元祖餃子  

宇治綠茶都好濃味   餃子+特飲就加多 $30   

( 23-FEB-2016  TUE )

今朝有啲凍   但係濕凍囉   最鬼慘 ~  

早餐食芝腿治   食三文治食到好悶   但附近茶記嘅奶茶咖啡唔掂   如果唔係都可以轉下囉 ~

菇場唔忙   所以更加眼瞓   哈哈哈哈 ~

媽咪無啦啦打嚟   仲以為出得院添   原來佢只打嚟問我有無嘢 ~

Lunch Time 出去行個大運就買酸辣米線番菇場食   慢慢嘆勁爽呢   最正係無食到出汗   因為街又凍   菇場又好鬼凍囉 ~

忙咗陣又 Hea 等放工   搭小巴去探媽咪   好感恩好快有車   車程又暢順呀 ~

見到媽咪又聞貓鬚   好在係 0.5 度   不過今日佢都食咗少少燒鵝飯   我咪話囉   又話驚死   但又食埋啲毒嘢   都唔知諗乜 ~

之後隔離床位婆婆話比佢食啦   起碼肯食嘢   我話佢唔食得呢啲㗎   婆婆就無出聲 lu ~

媽咪今晚噴氣有 170   係非常之好㗎  之後得 90   有時 50 添咋   因為今次姑娘話叫佢要坐直   同埋要自己拎住個吹氣筒   咁吹出嚟嘅結果先準囉   所以即係之前嘅數據係嘥鬼氣啦   懶成咁   真係好鬼煩   仲話醫生知佢唔做得運動   我話係妳唔做運動   唔係唔做得運動   醫生姑娘都知妳懶啦   係人都睇到 ~

咁順便問埋媽咪之前啲報告係咩情況   姑娘話如果無打電話比我哋   即係報告無問題   聽完我都安心哂 ~

今晚媽咪都有講下嘢   算佢啦   但我都同佢講唔知點解可以懶得咁緊要   Fing 下手腳都懶   大佬   又唔係叫妳去跑步做掌上壓   咁都唔願郁   真係無藥可救 ~

7 點半左右走喇   居然車等人   我見到好似仲有幾個位   不過我唔理啦   照跑   容乜易佢一陣開車走呀   但司機示意我唔駛急   哈哈 ~

8 點唔夠就番到九龍灣喇   第一次咁早   幫埋里奧大人買麵包先去食嘢   諗住試食嘢   但里奧大人話要等 5 張枱   咁我話唔等喇   難得咁早番到   想早食早休息   所以最後都係去番大阪王將呢 ~

好鬼飽呀   所以喺商場行個圈先番屋企呢 ~

執埋衫就沖涼   之後就休息喇 ~

里奧大人兒甥仔 3 月會去北非做嘢   咁里奧大人就送部 I-Pad Pro 比佢   佢 Whatsapp 話 "多謝舅父   我會好好珍惜"   嘩   睇到 "會好好珍惜" 呢 5 個字真係好感動呀   如果呢一句係出現喺晴晴一家人果度就好咯   兒甥仔仲要係話想買二手機就得添   但里奧大人堅持話送佢新機   始終係帶去外國   新機都係好啲   起碼有保養嘛   同埋我地絕對放心佢真係會好好珍惜囉   所以身教真係好緊要   佢哋食嘢又係唔會浪費   有佢哋喺度   一定唔駛驚食唔哂   哈哈 ~

今晚其實想早啲瞓   但估唔到都係要 11 點幾瞓   希望一覺瞓天光啦 ~