魚片炒麵 + 豆苗 ( 15-FEB-2016 )

( 15-FEB-2016  MON )

今朝唔想起身   因為好鬼凍呀   得 13 度咋   尋日就 25 度   我仲同里奧大人講話相差 10 度應該唔會太凍   因為呢幾日潮濕又熱   可能覺得凍番 10 度就啱啱好添 ~

呢期我都 7 點 20 分起身   咁里奧大人就可以去餐廳食熱辣辣嘅三文治早餐 ~  

早餐食芝腿治   之後嘆埋報紙就番工   雖然飲咗咖啡   但都係好攰咁 ~

菇場忙呀   搞掂哂都 11 點幾   可以抖下 lu ~

Lunch 食粥 + 炸兩   其實唔餓   但又唔想就咁食粥咁悶   所以格硬食哂去   依家食到好驚 ~

好鬼飽   所以行咗半個鐘先番菇場   太耐無行   真係要行下 ~

眼瞓嘛   咁喺全盒拎粒糖食啦   咁試下梅子糖   點知超級勁難食   一陣藥水味   又勁酸   食到我胃痛呀   仲要之後成口都係藥水味   勁慘

里奧大人就好啦   食完 Lunch 可以放工   我以為係食開年飯   原來係 Annual Lunch   勁呀   如果我都係食 Annual Lunch 就好啦   唔駛成日星期六特登去食   都唔明點解會揀星期六   係人都會有節目家嘛   阻住哂 ~

水姑原來過咗嚟九龍灣   所以里奧大人陪佢食埋下午茶先番屋企   咁都好喎   難得佢放早 ~

仍然好鬼攰   不過點都想煮飯囉   所以放工即走去街市買餸喇 ~

天呀   樣樣菜都 $20-$24/斤   菜心唐生菜要 $20/斤真係買唔落   蕃茄 $16/斤   本來我想煮節瓜鹹蛋瘦肉湯   但節瓜都 $22/斤   仲要得番幾個細細又縮哂水咁嘅   我平時最貴都係 $10/斤咋   仲要係靚添   所以仍都係買唔落囉   等我頭先仲買定 2 隻鹹蛋添   依家留番嚟蒸肉餅算喇   哈哈 ~

是日懶餐 - 魚片炒麵 + 豆苗

魚片炒麵 - 買咗 2 個豉油麵餅   好似係咁叫   但炒埋就好鬼多   好在可以留番做 Lunch Box ~  

豆苗 - $20 有半斤   算平㗎喇   今晚無心機煮   所以就咁灼就算喇 ~

搞掂哂都 8 點幾   沖埋涼就食生果   之後再睇 "無心法師"   我比自己抖埋今晚   聽晚又要執下嘢㗎喇   哈哈 ~

11 點唔夠就瞓   依家早 10 分鐘起身   都咪話唔係一個挑戰呀   哈哈 ~